Немда тӱҥалтышлан вуйым савена

«Саскавий» марий ӱдырамаш ушем ынде кокымшо ий почела «Немда тӱҥалтышлан вуйсавыш» мер акцийым эртара. Тудым «Саскавийын» кызытсе вуйлатышыже Ираида Степанова темлен. Тений угыч Кужэҥер, У Торъял кундемла да Йошкар-Ола гыч кумылан-влак Халтурино ял воктеке - Немда эҥерын тӱҥалтышыж деке – мийышт, вара корным У Торъял районыш такыртышт...

Немда тӱҥалтыште кугу куэ калыкым вашлие. Тудым марий солык дене ӧндалме. Тышке толмеке, тичмаш киндым, мелнам, пура атым вераҥдышт, сортам чӱктен, вуйым савышт. Онаеҥ Вячеслав Актуганов Ош Кугу Юмылан, Лемде Кугызалан пелештыш.

Тиддеч вара чыланат вӱд деке волышт, Немдалан тауштен, чурийвылышым шӱялтышт.

Ты кечын Немда деке унала толшо-влакым пӱртӱс, игече чот тергышт. Кечат ончыч, пылат чумыргыш, кӱдырчан йӱрат йӱрын кайыш, шолемат перкалыш, тале мардежат оза улмыжым ончыктыш. Но, калыкын кумылжым пӱртӱс ава шижын моштыш – чытымашым терген налмеке, кечан игечымак пӧлеклыш.

Немда тӱҥалтышлан вуйым савен, чумыргышо-влак эҥерын йогымыж почеш У Торъял район Татаренерыш (Часамласола) кудальыч. Тиде ял воктене, эн кӱкшӧ верыште, нуным ты районысо калык, Торъял землячествым вуйлатыше Виктор Наумов кинде-шинчал дене вашлийыч.

А пайрем умбакыже Сопкан монча манме куэрыште эртыш. Тӱҥ онаеҥ Александр Таныгин мутым пелыштыш. Чумыргышо-влак Немда эҥерын Марий Эл мучко 103 меҥгым (43-шо У Торъялыште) йогымо корныштыжо верланыше кажне гаяк илем нерген ойлышт, лӱмлӧ еҥ-влак нерген каласкалышт. Мурымашке-куштымашке йоча-влак ушнышт. А ик эн сылне шӱпыкшӧ Елизавета Коновалова ыле.

«Немда тӱҥалтышлан вуйсавыш» акцийын шке тамгажат уло. Тӱрлымӧ тамгам ты гана У Торъял районлан кучыктымо, вес ийын Шернур районыш кусна.

Тыге «Саскавий» дене пырля Немдам да тушто илыше калыкым, марийын эртыме корныжым шымлена. Посна акций гоч самырыктукым коклаш йӱланам шарена.

Автор: Лемде ӱдыр.
Иван Речкинын фотожо.