ТӰВЫРА - Гран-при Ивановыш каен

7 апрельыште «Михаил Мурашко приглашает друзей» III тӱнямбал куштымаш конкурс-фестивальын гала-концертше эртыш. А конкурс 4 апрельыште тӱҥалын. Кугу таҥасымаш деч вара сеҥыше-влакым палемденыт. Тыге гран-прим Иваново ола гыч куштызо-влак налыныт.

Конкурс-фестивальыш Российын тӱрлӧ регионжо гыч чылаже ик тӱжем наре куштызо ден хореограф-влак ушненыт. Тиде – Иваново, Кемерово, Татарстан, Одо, Пошкырт, Чуваший кундемла гыч. Марий Эл гычат ятыр мастар коллектив ден посна участник-влак лийыныт.

Икте-весым ончалаш, ваш-ваш тунемаш, шке мастарлыкым ончыкташ, опытым погаш – тыгай шонымаш дене нине кечылаште илен кажне участник. Тыгодым фестиваль калык тӱвырам аралаш, вияҥдаш, чыла тиде поянлыкым самырык тукымлан шуяш кумылаҥдаш да калык-влак кокласе кылым пеҥгыдемдаш манын эртаралтеш.

Фестиваль-конкурс кышкарыштак пошкудо Татарстан гыч «Казань» ансамбль моткоч чаплын выступатлен.