«Волгыдо» ансамбльым саламлена!

«Волгыдо» ансамбльым саламлена!

«Чолга шӱдыр» телевизионный муро конкурсын гала-концертше 29 мартыште Сеҥымашын XXX идалыкше лӱмеш тӱвыра полатыште (Йошкар-Ола) эртен.
Тудо 15 ий почела «Марий Эл» ГТРК ден Марий кугыжаныш филармонийын эртарыме фестивальышт семын палыме лийын гын, ынде кокымшо ий почела конкурс семын эрта.

Ты гана гала-концерт марте 19 участник миен шуын. Нунын радамышке самырык-шамычат ятырын логалыныт. Теве - Елена Актуганова (Волжский район), Виолетта Антонова (Шернур район), Дарья Лапшина (Морко район), Сагита (Татарстан) да молат.

Йошкар-Ола гыч Надежда Тимофееват икымше гана «Чолга шӱдыр» конкурсышто шке вийжым терген. Самырык мурызылан тиде пайрем моткоч чот келшен. Тушто тудо «Чукаем-шамычлан» мурыжым йоҥгалтарен. У муро да самырык мурызо нерген варарак эше возена, а кызыт палемдыме шуэш: конкурсыш Йошкар-Ола, Моско, Озаҥ, Марий Элын Волжский, Морко, Оршанке, Шернур кундемлаж гыч ушненыт. Кум ансамбль лийын. Тиде – «Август RUSH», «Волгыд» да «Шанчи».

Гран-прим «Волгыдо» ансамбль сеҥен налын.