Поэтессе, туныктышо Дина Рычкова студент-влак дене вашлийын

Вход на сайт

2016 ий ага тылзе тӱҥалтышыште Марий кугыжаныш университетын марий йылме да литератур кафедрыже оҥай вашлиймышым эртырыш. Ты вашлиймашын вучымо унаже Дина Михайловна Рычкова лие.

VBHRUwvS1t8.jpg

Дина Рычкова 1959 ийыште Шернур районысо Йошкар Памаш ялыште шочын. 1981 ийыште Марисоласе кыдалаш школышто марий йылме да литератур туныктышылан тыршаш тӱҥалын. Кӱкшӧ званий-влакым сулен налын: «Лучший Учитель России» да «Почётный работник общего образования Российской Федерации».

Тидын годымак сылнымут дене эреак кылым кучен, тӱрлӧ книга-влакым савыктен луктын. Уста поэтессе литератур премий дене ик гана веле огыл палемдалтын. Мутат уке, туныктымо пашалан посна тӱткышым ойырен, туныктышо-влаклан туныктымо пособий-влакым луктеден.

Пытартыш жапыште Дина Михайловна Мӱндыр Эрвелыште илен, уныкаже-влакым ончаш полшен.Но туштат сылнымутым кудалтен огыл. Ты верлаште илыше марий-влак дене вашлийын, илышышт нерген очеркым возен. Тыге «Мӱндыр Эрвелын шокшыжо» очерк да ойлымаш книгам луктын. Йоча-влаклан кок йылме дене возымо «Тӱняште эн сай ола – Уссурийск» книгам савыктен. Тудын рушла серыме ойлымашыже-влак Хабаровскышто, Владивостокышто лекше литератур сборниклашке пуреныт.

TFiccU7itSw.jpg

Вашлийымаш пеш ласкан эртыш, Дина Рычкова шке илыш корныж дене палдарыш, еш да йочаже-влак нерген ойлыш. Туныктымо паша нергенат ончыкылык туныктышо-влаклан шуко ой-каҥашым каласен кодыш. Кузе да молан тудо сылнымут деке лишыл лийын, палемдыш. Савыкталтме книгаж-влак дене палымым ыштыш.

Дина Рычкова уста поэтессе да кугу опытан туныктышо веле огыл, тудо тыгак поро да волгыдо чонан айдеме, шуко ужшо да шуко палыше.

Тыгай вашлиймаш ончыкылык туныктышо-влаклан пеш пайдале. Вашлийын мутланен, студент-влак шукым пален налыт да умбыкыже, ӱшанен кодаш логалеш, тыгаяк мастар туныктышо марте кушкыт.

Автор: Анна Васильева.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.