«Немда тӱҥалтыш вер-шöрым йытырайымаш» экологий акций эртен

«Саскавий» марий ӱдырамаш ушем Немда эҥер тӱҥалтышым Кужэҥер район Халтурино ял воктене 2015 ий 3 октябрьыште (шуматкече) йытырайыш. Тиде сомылым ворандараш верысе калык полшыш.

Да, ончылгоч шонен пыштыме поро пашам шуктышо-влакым шыже йÿрат, кугу мардежат ыш чактаре. Юмылан пелештен, пел шагатлан вараш лекмеке, игечат вашталте, кече ончале.

Палемдыме верым шÿкшак, йöрылтше пушеҥге, кушкыл деч эрыктышт. Рÿж да уло кумылын пашам ыштымылан кöра нойымашат ыш шижалт.

Ты пагытыштак шÿр, пучымыш, шудо чай подлаште шольо. Чыла пашам пытарымеке, яндар южышто каналташ могай сай. Кочкышыжо могай тутло!

Тиде кечын «Саскавий» марий ӱдырамаш ушемым вуйлатыше Ириада Степанован шочмо кечыже ыле. Тудо палемда: «Мылам пÿртÿс лоҥгаште тыге сомылым ворандарен шочмо кечым эртараш моткоч келшыш».

Ончыкшым ты мландым верысе-влак межеватлаш шонат. Вет тиде вер ялысе туризмым вияҥдаш полшен кертеш. Теве «Пиалан отром» ышташ лиеш.

Тиде суапле пашам шуктышо-влаклан моткоч кугу тау. Теве нунын лÿмышт!

«Саскавий» марий ӱдырамаш ушем деч:
Ираида Александровна Степанова, Зинаида Николаевна ден Вячеслав Александрович Александровмыт, Ольга Васильевна Якимова, Надежда Геннадьевна Алметова, Александр Валерьевич Степанов да самырыкъеҥ Даниил Анисимов.

Кужэҥер кундем деч:
район администрацийыште, рÿдö клуб, библиотеке системыште, тоштер-ончер рÿдерыште тыршыше-влак Ольга Павловна Новикова,Людмила Константиновна Чепаева, Надежда Алексеевна Бурманова, Татьяна Викторовна Константинова, Лариса Витальевна Кальсина, Анатолий Дмитриевич Андреев, Владимир Павлович Новиков, Марина Анатольевна Пирогова, Светлана Семеновна Швецова да амалкалче Андрей Петрович Пайдыганов.

Тыге кум ий почела «Немда тӱҥалтышлан вуйсавыш» тӱвыра-экологий акцийым арам огыл эртарыме. Теве эше ик сай лектышыш шумо. Тек йырым-йырысе пÿртÿс тÿзланен шога.

Автор: Эльвира Куклина.