2015 идалык марий йылме дене лекше икымше савыктышын 100 ияш лÿмгечыж дене кылдалтын. Тыге ий мучко Марий Эл Республикыште лекше да Россий мучко шарлыше «Марий Эл» газет ты пайремлан пöлеклалтше ятыр мероприятийым эртара. Теве 9 сентябрьыште марий журналист-влак, пырля чумырген, пушеҥгым шынденыт.

Марий Эл Республикысе чодыра ден сонар озанлык министерствын полшымыж дене Куяр лестничествын ик кумда верышкыже (Медведево район Усть-Кундыш ял воктене) 3500 пÿнчым шындыме. Тиде сомылым ик шагатат пеле жапыште 40 утла еҥ шуктен.

Суапле пашашке ушненыт: Марий Эл Республикысе тÿвыра, печать да калык-влакын пашашт шотышто министр Михаил Васютин, ты министерствыште печать да тÿшка кыл управленийым вуйлатыше Владимир Маркин, управленийын пашаеҥже Олег Тихонов, «Марий Эл», «Кугарня», «Ямде лий» газет ден «Ончыко» журнал редакцийлаште тыршыше-влак.

Сомылым пытарымеке, «Марий Эл» газетым вуйлатыше Александр Абдулов палемден: газетым лукташ шагал огыл кагаз кая, а кагазым ышташ чодырам кучылтыт. Тыге, пушеҥгым шынден, чодыра шукемеш, газетымат лукташ йöн шукырак лиеш. А пушеҥгым ты гана шындыме вер пытартыш жапыште яра киен, тыште чодыра 2010 ий шокшо кеҥеж годым йÿлен.

Пушеҥгым моло кумылан еҥат шынден кертеш. Марий Эл Республикысе чодыра ден сонар озанлык министерствыште кушкыл-влакым налаш лиеш.

Ужарген тÿвыргышö кундемыште илаш сай.

Автор: Эльвира Куклина.
Денис Речкинын фотожо.

• Сай отметке-влакым тыланена, но эн тÿҥжö шинчымаш