Оласе «Колумб лудмаш» сеҥыше-влакым палемден

2015 ий 21 майыште Йошкар-Оласе 14 №-ан гимназийыште «Колумб лудмаш» оласе сылнымут конкурс эртыш. Марий да руш йылме дене почеламут-влакым 34 студент, школышто тунемше да ик туныктышо сылнын лудыч. Тыге Регион-влак кокласе «Колумб лудмаш» фестиваль-конкурсышто (Морко р-н, 26 июнь) Йошкар-Олан чапшым аралаш тÿҥалыт: Арина Филатьева («12 ий марте» номинаций, 20-шо №-ан школ), Ирина Кугергина («13 гыч 18 ияш марте» номинаций, 21-ше №-ан школ), Христина Иванова («18 ияш деч кугурак-влак…» номинаций, МарГУ). Нуно оласе конкурсышто икымше верыш лектыныт.

Сылнымут пайремым Республиксе марий тӱвыра рӱдер эртарыш. Тыге конкурс тÿҥалтыште рӱдерым вуйлатыше Наталья Пушкина да «Марий ушем» организаций вуйверын еҥже, Валентин Колумб лӱмеш рӱдер-тоштерым вуйлатыше Владимир Козлов поро мут дене чылаштым саламлышт.

Могай конкурс жюри деч посна? Конкурсант-влакын лудмыштым аклаш палыме да пагалыме еҥ-влак ушнышт. Тиде – Маргарита Медикова (жюри вуйлатыше), Россий Федерацийын сулло артистше, Марий Элын калык артистше; Людмила Кошкина, Россий Федерацийын кӱшыл профессионал образованийын сулло пашаеҥже, Марий тӱвыра рӱдерыште тӱвыра да каныш пӧлкам вуйлатыше, Татьяна Соловьёва, МарГУ-со мер кыл пöлкан корреспондентше, Олык Ипай лӱмеш премийын лауреатше, марий поэтессе да мурызо.

Пайрем кумылым 14-ше №-ан гимназийын «Изи памаш» йоча образцовый ансамбльже пӧлеклыш. Сылне марий муро да куштымаш-влак дене залыште погынышо-влакын кумылыштым савырыш. Марий Элын сулло артисткыже, А. Искндаров лӱмеш кугыжаныш капеллын солисткыже Людмила Иванова Валентин Колумбын возымо «Памаш воктене» мурыжым (семже Валерий Кульшетовын) йоҥгалтарыш. Татьяна Соловьеват «Латшым ияш» мурым чыла толшо-влаклан пӧлеклыш.

А «Колумб лудмашым» моткоч сылнын Марий кугыжаныш университетын чолга студентше-влак Николай Любимов да Христина Иванова вӱдышт.

Кажне участник сертификат да изирак пӧлек дене, а сеҥыше-влак Чап танык да шерге пӧлек дене палемдалтыч. Конкурсант-влакым ямдылымылан Марий тӱвыра рӱдер марий йылмым туныктышо-влаклан Таумутым кучыктыш.

Конкурс годымак МарГУ-со краеведений тоштерым вуйлатыше Галина Корнилован ямдылыме «Колумб ончер» дене палыме лияш йöн ыле. Валентин Колумбын книгаж ден тудын нерген возымо материал-влакым иктыш чумырымо.

Эше "Колумбын почеламутшым сÿрет гоч ончыктымаш" номинацийыш кум паша пурен.

Тыге оласе конкурсышто ончыл верыш лекше-влакым саламлена. Да 26 июньышто Морко район Пумор ялыште эртаралтше Регион-влак кокласе «Колумб лудмаш» фестиваль-конкурсышто сеҥымашым тыланена.

Ик сылне почеламутыштыжо поэт Валентин Колумб (тений тудын шочмыжлан 80 ий темын) возен:
«…Тол, поэт йолташем, теплоходым вӱдем.
Кугешналын, коштам Юл ӱмбалне.
Тол, поэт йолташем, борт воктек шогалтем,
Теҥыз але эҥер – тек шонкале…».

Автор: Ирина Закиева, Йошкар-Оласе 7-ше №-ан школын
марий (кугыжаныш) йылмым туныктышыжо, Самырык этножурналист школын еҥже.