Валентин Борисович Исенековын 80 ияш лӱмгечыжлан пӧлеклалтше шарнымаш кас эртыш (фото)

19 мартыште С.Г. Чавайн лӱмеш книгагудын конференц-залыштыже (Йошкар-Ола) Валентин Борисович Исенековын 80 ияш лӱмгечыжлан пӧлеклалтше шарнымаш кас эртыш.Тиде касыш лӱмлӧ писатель ден поэт, шанчыеҥ, радио, газет да телевидений гыч журналист-влак, «Марий краевед» клубын членже, туныктышо да тунемше, студен-влак да тыгак В.Исенековын родо-тукымжо толыныт.

Шарнымаш касым «Ямде лий» газет редакций да С.Г. Чавайн лӱмеш библиотекын пашаеҥже-влак ямдыленыт.

Валентин Борисович Исенеков – поэт, писатель, журналист, «Ямде лий» газетын пашаеҥже. Тудо 1935 ий 19 мартыште Одо (Удмурт АССР) кундемысе Карагӧл район Шопкер ялыште кресаньык ешеш шочын-кушкын. Пошкудо Татарстан кундемысе Агрыз район Буймо шымияш школышто тунемын. 1950 ийыште, шымияш школым тунем пытарымеке, Кама ден Юл эҥерлаште сплавщиклан пашам ыштен. Вара Йошкар-Оласе культпросвет школышто шинчымашыжым нӧлтен, специалист лийын, шочмо Шопкер ялышкыже пӧртылын да клуб вуйлатышылан тыршен.

1961 ийыште Валентин Исенеков Н.К.Крупская лӱмеш Марий пединститутыш тунемаш пурен, но тунеммашым коден. 1963-1965 ийлаште Звенигово районысо «Передовик» газетыште пашам ыштен. Н.К.Крупская лӱмеш Марий пединститутым заочно тунем пытарен.

Шочмо йылме деке йӧратымаш В.Исенековлан землякше, писатель Илья Ломберский деч куснен. Латкумияш Валентин Илья Михайлович деке шочмо ялышкыже, Ныргындышыш, палыме лияш миен.

В.Исенековын почеламутшо-влакым руш, удмурт, татар йылмылашке кусарыме. Тудо шкеже А.Пушкинын, С.Михалковын, Г.Тукайын, М.Джалильын сылнымутыштым марлаҥден.

В.Исенеков шымлымаш пашамат шуктен. Марий АССР-ын калык писательже Никандр Лекайнын усталык биографийжым радамлен, кум том дене савыктен лукташ чумырен.

Валентин Исенеков альманахым, тӱшка сборникым, нунын коклаште «Эрвий», «Пионер тулойып», «Герой пионер-влак» книгалам чумырымаште чот тыршен. Кугу Ачамланде сарыште лийше писатель-влак нерген «Арслан тукым» очерк сборникым чумырен.
1967 ийыште В.Исенеков «Ямде лий!» газет редакцийыш пашаш толын. Тыште ӱмыржӧ кӱрылтмеш тыршен. «Ямде лий» газет редакцийыште 21 ий пашам ыштыме жапыште йочан койыш-шоктышыжым сайын умылен моштен. Сандене йочаланат произведений-влакым возен. Тиде – «А гыч Я марте» (1975), «Шӱдыр» (1980), «Мемнан Мики» (1986).

«Тыматле ласка койышыжо, ушан шомакше дене Валентин Исенеков самырык возышо-влакым пашалан туныктен, полшен, таратен, кумылаҥден шоген. Молын семын самырыкын материалжым удырен-рожген кышкаш тӧчен огыл, пырля каҥашен, келшыше ой-шомакым муаш полшен», – возен прозаик Геннадий Алексеев.

Валентин Борисович ятыр юнкорлан илышыштыже чын корным муаш полшен. Туныктышым порын шарнен, «Ямде лий» редакций кажне ийын юнкор да литературно-творческий пашам сайын виктарен колтышо кружоклан В.Исенеков лӱмеш премийым палемден.

В.Б.Исенеков лӱмеш премийын лауреатше лӱмым сеҥен налше юнкор да литературно-творческий кружок-влак:
2013 ий – Морко район Шӱргыял школ,
2012 ий – Кужеҥер район Ӱштымбал школ («Кӱдыроҥгыр» кружок),
2011 ий – Волжский район Карай школ,
2010 ий – У Торъял район ТоштоТоръял школ,
2009 ий – У Торъял район Немда школ,
2008 ий – Кужеҥер район Шӱдымарий школ,
2007 ий – Морко район Токперде школ,
2006 ий – Морко район Коркатово школ,
2004-2005 ийла – Волжский район Сотнур школ,
1999 ий – Морко район Кокласола школ,
1998 ий – Волжский район РушШайра школ.
2014 ийыште В.Исенеков лӱмеш премийым Кужеҥер район Коҥганур школ сулен налын.

Шошо касене Исенековын йолташыже-влак ятыр шарнымашым каласкалышт, тунемшыже-влак почеламутым пӧлеклышт. Куанле ыле шочмо шӱжаржым – Елена Борисовна Каликаевам вашлияш. Эргыже – Валентин Валентинович Исенеков тыге порын шарнымаш касым эртарымылан тауштыш.

Каласен кодыман, В.Исенековын шочмо Шопкер ял школыштыжо йыргешке ӱстел эртен. А 4 апрельыште тудын лӱмеш одо кундемыште кугу фестиваль лиеш.

Тений СЫЛНЫМУТ ИДАЛЫК! «Ямде лий» газет редакций кугу пашам наҥгая. Редакций пашаеҥ-влак В.Б. Исенековын 80 ияш лӱмгечыжлан пӧлеклалтше «Капар тукым» книгам савыкташ ямдыленыт. Ӱшаныме шуэш, тений тиде книга лудшо деке миен шуэш да книга презентаций угыч зал тич калыкым пога.

Автор: Ирина Закиева.
Информацийым шарнымаш касыште кучылтмо презентаций материал гыч налме.
Фотом Петр Васильев ыштен.