1-16 пеледыш - Агавайрем

Вход на сайт

1-16 пеледыш тылзыште Агавайрем кумалтыш эрта. 2013 ий 15 июньыште Йошкар-Оласе Тумер отышто Агавайрем юмылан иктешлен кумалмаш лиеш.

56948_640.jpg

Шошымсо пасу паша пытымеке, марий-влак Агавайрем кумалтышыш лектыт. Шурно сай лектышан лийже, йӱржат леве да жапыштыже толжо, мардежат лыжга лийже, саскам поген налаш йӧн лийже, тазалыкат ситыше лийже манын кумалыт. Агавайрем Юмо кава, кече, тылзе, шӱдыр-влакын ӱнаран вийыштым иктеш чумыра, мардеж, пыл, вӱд дене пайдаланен, шулыкан вий-куатым шочыкта да тудым, илышлан йӧнештарен, уло тӱня кумдыкеш шара. Тыге Агавайрем Юмо пӱртӱслан шочаш, тӱзланаш ситыше аҥалыкым кумдаҥда, илыше вий дене тӱням пойдара.

Шуко кундемлаште Агавайрем кумалтыш деч вара ял калык модмашым эртара. Муно дене тӱрлӧ семын модыт. Вет муно - тиде нӧшмӧ, тудо илышым умбакыже шуйышо пале, илышын нимучашдымылыкшым ончыкта... Агавайрем кӱсото йыр кум гана куржын, кугуракше ошкылын эртат, "вес Агавайрем марте тазалык ситыже" маныт. Агавайрем тулолмо йыр чарайола кече почеш кум гана эртат, тидын годым "Мланде Ава дене вашкыл пеҥгыде лийже" маныт. Икте кодде, чыланат лӱҥгалтыш дене лӱҥгалтат, "кап-кыл тыгаяк куштылго лийже" маныт. Тулолмо гочын кум гына тӧрштен вончат, "Тул Ава, осал да нойымо дечын, тӱтлӧ чер дечын ойыро" манын йодыт".

Агавайремыште посна тӱткышым кодшо тыгай кумалтыш деч вара ешым чумыршышо самырык мужыр-влаклан ойырат. "Оръеҥлан сугыньлен, муным пӧлеклат. А самырык мужыр онаеҥлан тӱрлеман солыкым пуа. Ваштарешыже онаеҥ, сугыньым каласен, оръеҥын пурла вачышкыже тыгак солыкым пышта.

Теве эше мо оҥайже, шонаш таратышыже: "Кайыме деч ончыч чылан, поче-поче Агавайрем онапум ӧндалын, тауштен, кӱсото гыч лекташ тарванат. Агавайрем кӱсото гыч лекмеке, сукен шинчын, шнуй верлан тауштат да, кумалтыш шотлан толын манын, ӱшаным луктын ойлат да эше ик гана тауштат.

Агавайрем кумалтышын ямже ялышке волыжо манын, мужыр дене шогалын, ваш кидым кучен уло калык иканаште вӱдйогын дене ялышке йога. Изижге-кугужге "Агавайрем! Памаш вӱд гай йога, ший вӱд гай йога. Агавайрем!" манын, ял марте модын-воштыл, ваш-ваш кумылым нӧлтен ошкылыт. Тидын годым самырык ма илалше огыт ойыркале.

Источник: Ираида Степанован "Кӱсото - Святая роща" книгаже.

Икымше лаштыкыш пöртылаш>>>

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.