Пытартыш жапыште марий блогым ышташ кумылан-влак шукемаш тӱҥалыныт. Тидыже, мутат уке, Марий Элысе тӱвыра, печать да калык-влакын пашашт шотышто министерствын марий сайт, блог-влак коклаште "Марнетын шӱдыржӧ" конкурсым эртарымаш денат кылдалтын. Теве эше тений Марий блоггер школ республик кӱкшытыштӧ икымше гана эртыш. Тудат ятыр еҥым шке блогым ышташ таратыш. Марий кугыжаныш университетысе калык тӱвыра да тӱвыра кокласе кыл институтын нылымше да визымше курслаште (РМ-42, РД-53) тунемшыж-влакат марий-финн блогым ышташ пижыныт - http://finnblogger.livejournal.com.

Марий-финн блог майыште журналист, блогъеҥ Эльвира Куклина дене вашлийме деч вара шочо. Эльвирам лачак блогым ышташ туныкташ финн йылме дене преподаватель Валентина Григорьевна Гаврилова ӱжын ыле. Тунам ӱдыр-рвезе-влак блогым вӱдымаште ик эн тӱҥ йодмаш дене палыме лийыч. Кодшо арняште тыгай вашлиймаш угыч эртыш. Ынде Эльвира Куклина блогым умбакыже вияҥдыме, сӧрастарыме, тудын лудшыжо-влакым шукемдыме нерген ойлыш.

"Блогын айдеме семынак шке чурийже лийшаш. Сандене тудым ыштыме деч ончычак шоналтыман: мо нерген лиеш, весе деч мо дене ойыртемалташ тӱҥалеш. Варажымат "шке чурийдам" эреак уэмден, сылнештен шогыман, - каласыш блогъеҥ. - Таче блогышто фото, видео-влак сайын ончалтыт. Тыгак социальный эҥыремышвот денат кылым кучыман - блогыш шындыме уверлан ссылкам тӱрлӧ вере колтен шогыман. Конкурсыштат шкем тергымаш - блогын лудшыжым шукемдаш полшен кертеш. Кузе? Эн ончыч, тендам палаш тӱҥалыт конкурсым эртарыше-влак, вара жюрин кажне еҥже тушко пурен ончалеш - келша гын, вес ганат тиде блогым эскераш тӱҥалеш. Тыгак тендан нерген конкурсым иктешлыме годым калыклан каласен кодат. А сеҥышыш лектыда гын, тиде у кӱкшыт!"

Шуко шоныде, марий-фин блогат "Марнетын шӱдыржӧ" конкурсыш ушныш. А тунемме пашаште у йӧным кучылтмаш моткоч сай. Самырыктукым деке мелын лийын моштыман, пагытын йодмыжым шижман.
Финн-марий блог тунемше-влаклан практик паша семын. Нуно марий да финн йылме-влакым палымыштым тыге пеҥгыдемдат.

Ешарыман, Марий блогъеҥ школ деч вара эше тыгай лаштык-влакым Интернетыште лудаш лиеш:
- http://colledge.livejournal.com;
- http://lyavi-tachana.livejournal.com;
- http://hristialex98.livejournal.com;
- http://pavvadim.livejournal.com.

Нуно эре ешаралтыт.

Автор: Лемде ӱдыр.

МАРИЙ БЛОГГЕР ШКОЛ! - ШКОЛА МАРИЙСКОГО БЛОГГЕРА!