"Мый марла ойлем" акций кушто да кунам лиеш?

"Мый марла ойлем" акций ынде икмыняр ий почела шошым, тӱҥ шотышто, Йошкар-Олаште эрта. Но тудым моло вереат эртарат. Ик пагалыме еҥ каласыме семын, "Мый марла ойлем" - тиде кугу толкын. Тудым ий мучко йӧн да амал лекме годым эре ыштыман. Да тушко чыла кумылан-влак, амалкалче-шамыч ушнен кертыт, кеч-могай кевытыште, тӧнежыште да моло вереат тидым эртараш лиеш.

Кугу акций тений 15-16 майыште Йошкар-Олаште эрта. Икымше кечын чолга да самырык мер пашаеҥ-шамыч йодыштмашым эртарат. Чыла тидым видеош войзат. А кокымше кечын 18 шагатлан Царевококшайский кремльыште чылаштымат вучат. Тушто концерт лиеш.

Акцийым Республикысе тӱвыра, печать да калык-влак коклаште паша шотышто министерствын полшымыж дене "ВийАр" ушем да Марий тӱвыра рӱдер эртарат.