Марий Эл Республикысе Т.Евсеев лӱмеш национальный тоштерыште у вуйлатыше

Марий Эл Республикысе Т.Евсеев лӱмеш национальный тоштерым 15 июль гыч Марий Эл Республик культурын сулло пашаеҥже Лидия Смирнова вуйлата.

Лидия Смирнова тылеч ончыч Курыкмарий администраций вуйлатышын организационно-правовой йодыш шотышто алмаштышыжлан ыштен. А 2006-2013 ийлаште, районысо культур отдел вуйлатыше лийын.

- Марий кундемын янлык ден кушкыл тӱняже, историй ден этнографий материалже, марий калыкын материальный да духовный поянлыкшым аралыше тоштер дене ме ончычат кылым кученна, толынат коштынна. Сандене пашаеҥ-влакат палыме лийыныт. Коллектив сайын вашлийын, — палемдыш национальный музейын у вуйлатышыже Лидия Смирнова. — Тылзе наре ыштымеке, у шонымаш-влак ушыш пурат. Тоштерын йӱлажым, поянлыкшым ончыкыжымат арален кодаш, вияҥдаш да умбакыжат пашаш уым пуртен шогаш шонем.

Икманаш, Т.Евсеев лӱмеш национальный тоштер ончыкыжымат калыклан чонеш логалше, марий тӱвырам арален кодышо ятыр у паша дене палдараш тӱҥалеш.

Лидия Никоноровна Курыкмарий районысо Митрисола гыч. Тудын пелашыже — Николай Смирнов, Национальный президент искусство школын директоржо, Марий Эл Республик культурын сулло пашаеҥже. Музык шӱлышеш кок йочам ончен куштат. Нунат ача-аваштым ончен, музыклан шӱман кушкыт. Коктынат Москваште Гнесинмыт лӱмеш Российысе музык академийын студентышт улыт. Артем эргышт икымше курсышто тунемаш тӱҥалеш, а Агата ӱдырышт тений академийым тунем лектеш. Смирновмыт «Шактенваж» еш ансамбльым чумыреныт.

Автор: Алевтина Байкова.
Источник: http://gazetamariel.ru.