Чукаем-шамычлан.Мутшо Геннадий Сабанцевын, семже Валерий Кульшетовын, мура Надежда Тимофеева.

Надежда Тимофеева – марий эстрадыште у лӱм. Шукерте огыл самырык мурызо «Чукаем-шамычлан» икымше мурыж дене калык ончыко лектын да шукыштлан вигак келшен шинчын.

Надежда шкеже Морко район Кабаксолаште шочын, Советский район Вечын посёлкышто кушкын, Президент школым тунем пытарен, И.С.Палантай лӱмеш республикысе тӱвыра да сымыктыш колледжыште, вара Марий кугыжаныш университетын тӱвыра да сымыктыш факультетыштыже вокалым тунемын. Кызыт посна еҥ-влакым шкеже мураш туныкта да, эн тӱҥжӧ, Викуля ӱдыржым онча.

Ик ийым эртыше Викуляк у мурылан шочаш амалым ыштен. Кузе каласкалыш Надя, ик кастене пиалан еш каналтен шинчен. Викуля шке семынже ала-мом йырымлен, модын. Тунам ачаже, кумдан палыме марий композитор Валерий Кульшетов, рояль деке миен да семым модаш тӱҥалын… Тыге шочын у мурылан сем.

А кӧлан мураш? Нимогай кокытеланымаш лийын огыл. Валерий Дмитриевич «лач аваже йонгалтараш тӱҥалеш» каласен!

«Чукаем-шамычлан» муро икмыняр концертыште йоҥгалтын. Надежда Тимофеева «Чолга шӱдыр» муро фестивальышкат икымше гана тиде муро дене лектын. Марий Эл Радион колыштшыжо-влак ты мурым йӧратат. Теве хит-парадыштат икымше верыште лийын. Тек тыгай ныжыл да сылне муро-влак шуко шочыт!!!

"Чукаем-шамыч" муро нерген Марий Эл ТВ каласкала.

ЧУКАЕМ-ШАМЫЧЛАН
Мутшо Геннадий Сабанцевын,
семже Валерий Кульшетовын

1.ВОЛГЫДО КОК ШӰДЫРЛА,
ЛЫВЫРГЕ КОК ШУЛДЫРЛА
ШӰМ-КЫЛЕМ ЫРЫКТЕДА
ВИЙЫМ ПУЭДА.
ОШ ПЕЛЕДЫШ ӰДЫРЕМ
ЭРГЫМ - НӦНЧЫК ПАТЫРЕМ.
КАЖНЫЖЕ ИЗИ ЧУКАЙ,
НЫЖЫЛГЕ ТУГАЙ

ПРИПЕВ:
АДАК КАВА ГЫЧ ЙӰД ВОЛЕН,
ЧЫЛА ЧОНАНЫМАТ МАЛТА,
ЛАСКАЛЫК ДЕНЕ АВАЛТЕН
ТЕНДАМ ШЫМАН ПЕШ НИЯЛТА.
САЙ ОМО ТЫЛАНДА КОНЧА
ДА ШЫРГЫЖМАШЫМ ЛАЧ ШАВА,
ТЕНДАН ВОКТЕКЕ ЛИЙЫН ЧАК
МОТОР ТӰНЯМ САКЛА АВА

2.УГЫЧЫН У ЭР ТОЛЕШ
СЫЛНЕ КЕЧЫДА ЛӰМЕШ.
КЕЧ ИЗИШ ДА КУШКЫНДА, ПАТЫР ЛИЙЫНДА,
ОШ ПЕЛЕДЫШ ӰДЫРЕМ
ЭРГЫМ - НӦНЧЫК ПАТЫРЕМ,
УЛЫДА ИЗИ ЧУКАЙ - НАРАШТА ТУГАЙ.
ИЛЫШ КЫЗЫТ ОЗЫРКАН,
ШЫДЕ ТОЛКЫН МАРДЕЖАН
НӦРГӦ ПАДЫРАШ-ВЛАКЛАН ПАТЫРЕШТ КУШМАН.
ТЕК ОК ЛИЙ ШЕМ КЕЧЫДА,
ТЕК УМА ЧОН ВЕЧЫДА.
ТИДЫН ВЕРЧЫН ЮМЫЛАН КЕЧЫН КУМАЛАМ

ПРИПЕВ:
А КЫЗЫТ КӰШЫЧ ЙӰД ВОЛЕН,
ЧЫЛА ЧОНАНЫМАТ МАЛТА,
ЛАСКАЛЫК ДЕНЕ АВАЛТЕН,
ТЕНДАМ ШЫМАН ПЕШ НИЯЛТА -
САЙ ОМО ТЫЛАНДА КОНЧА,
ДА ШЫРГЫЖМАШЫМ ЛАЧ ШАВА.
ТЕНДАН ВОКТЕКЕ ЛИЙЫН ЧАК, МОТОР ТӰНЯМ САКЛА АВА.