Йот ӱдыр-эрге-влак Пошкырт кундемыштат лийыныт

7 гыч 26 июль марте Марий кугыжаныш университет пелен Россий да йот элла гыч толшо-влаклан марий йылмым да тÿвырам тунемме курс эртен.

Тений тиде школ марий йылмым тунемаш кумылан-влаклан 13-шо гана шке омсажым почын. Ты гана Германий, Швейцарий, Австрий, Финляндий, США да Моско ола гыч ӱдыр-эрге-влак погыненыт.

Школым вуйлата калыкле тӱвыра да тӱвыра кокласе коммуникаций институтын марий йылме да литератур кафедрыжым вуйлатышыже Лидия Сидоровна Матросова. Туныктышо-влак Эльвира Ивановна Пекшеева да Алёна Юрьевна Бакутова улыт. Тыгак Марий кугыжаныш университетын студентше-влак, Людмила Карпова ден уста баянист Алексей Степанов, школын тунемшыже-влак дене пырля марла муреныт-куштеныт, модыныт – икманаш, тӱвыра программым виктараш полшеныт.

Тыге кажне кастене гаяк тӱрло оҥай модмаш эртен. Теве теннис дене тӱнямбал турнирым ыштеныт. Таҥасымаште шке вийыштым тергеныт Швецарий, Марий Эл Морко район, Моско ола, США, Финляндий, Пошкырт кундем Сосновка ял, Марий Эл Кужэҥер район. Ончыко Марий Эл Морко район гыч Алексей Степанов лектын.

Тыгак кажне кастене гитара почеш мурен жапым веселан да шыман эртареныт.

Тенийысе школ ондаксе деч изиш ойыртемалтын. Теве школыш чумыргышо-влак Пошкырт кундемыште лийыныт. Нуным Мишкан район Пӱнчер ялыште уло кумылын вашлийыныт да верысе школыш илаш вераҥденыт.

Арняште жап пайдалын, оҥайын да веселан эрта. Толмо деч вара вес кечынже кумалтышыш миен тольыныт, юмыйӱла дене палыме лийыныт. Пошкудо ял-влакат торашке кодын огытыл. Кажне кечын гаяк тӱрло ялыш марий касыш коштыныт, пошкырт марий-влакын пайремым пайремлен моштымыштым шымленыт, муро-влакыштым муреныт, «кандырам» пуненыт.

Школын тунемшыже-влаклан поснак «кандырам» кушташ келшен. Тыгайым шукынжо эше ужынат огытыл, а кызыт ынде шкештак сем почеш тавалтен кертыныт.

Марий ешыште лиймаш, школышто тунемше-влакын ончыктымо спектакль-концертышт, шудым солымаш, сӱаным ончымаш, энерыште йӱштылмаш, шем мончаш пурымаш, ялысе дискотека, экскурсий-влак - чылажат уна-шамычын ушешышт кодын, манын шонена.

Автор: Людмила Карпова.