«Изи мӧр пеледыш» - вес семынже тудым «йоча Пеледыш пайрем» маныт. Тений тыгай пайрем 4 июньышто Шернур посёлкышто Регион-влак кокласе йоча усталык фестиваль-конкурс семын эртыш.

Мутат уке, «йоча Пеледыш пайремын» ик эн тӱҥ шонымашыже – марий йӱланам тукым гыч тукымыш шарен толаш, тендан чонышкыда, ончыкылык ӱшанна-влак, шочмо йылмына, калыкнан тӱвыраж деке поро кумылым, йӧратымашым шыҥдараш. Вет тыге гына ме калык семын аралалт кодын кертына, шуко тӱрлӧ еҥ коклаште шке поян историйна дене эреак ойыртемалташ тӱҥалына. Тидыже мемнан деке мелын савырнаш тарата. Вет кузе ойлат, тукым деч посна илыше Йыван лийшаш огынал. Тидымак палемдышт «Изи мӧр пеледыш» фестивальыш толшо кугу уна-влак: Марий Оньыжа, Марий Элысе Кугыжаныш Погын вуйлатышын алмаштышыже Анатолий Иванов, Республикысе тӱвыра, печать да калык-влакын пашашт шотышто министрын алмаштышыже, «Саскавий» марий ӱдырамаш ушем вуйверын еҥже Галина Ширяева, Шернур районысо администраций вуйлатыше Николай Лебедев, Туныктыш да шанче министерствын тӱҥ специалист-экспертше Галина Малинина, Советский район Ӱшнур школ директор, «Изи мӧр пеледыш» проектын авторжо, Мер Каҥашын еҥже Валерий Галкин да молат.

Чынже денак, икымше гана тыгай пайрем 2013 ийыште Советский район Ӱшнур школ пелен лийын. Тушко Марий Элысе 16 школ гыч 300 наре йоча погынен ыле. Тений «Изи мӧр пеледыш» йыр республикысе 12 район гыч 530 наре йоча (38 делегаций) чумырген. Кок ий почелат тудым регион-влак кӱкшытыштӧ эртараш тыршыме. Теве ты ганат Киров кундем Кильмезь гыч коллектив толаш лийын, но вучен ышна шукто…

Тений «Изи мӧр пеледыш» конкурс семын эртен. Йоча-влакын мастарлыкыштым ныл номинацийыште акленыт да кажныштыже гаяк кум лауреат да кум дипломант дене палемденыт. Чылаже жюри 40 наре куштымашым да 70 наре мурымашым ончен.
«Шкетын мурымаш» номинацийыште 8-10 ияш-влак коклаште 1-ше верым Шернурысо 2-шо №-ан школын тунемшыже Дарья Семёнова ден Полина Петухова суленыт, 10-14 ияш коклаште тиде школынак Дарья Лебедевам палемденыт, 14-18 ияш коклаште – ты школыштак тунемше Алла Лебедевам.

«Ансамбль дене мурымаш» номинацийыште 8-10 ияш коклаште 1-ше вер дене Шернурысо 2-шо №-ан школын «Радуга» ансамбльжым да Оршанке районысо Кугунур школын дуэтшым (Мария Акулова ден Кирилл Рябинин) палемденыт, 10-14 ияш коклаште – Шернур районысо Марисола школын «Ший оҥгыр» ансамбльжым, 14-18 ияш коклаште – Советский районысо Ӱшнур школын «Мурсем» ансамбльжым.

«Куштымаш» номинацийым ончалаш гын, 8-10 ияш коклаште Йошкар-Оласе» 7-ше №-ан школысо «Росинка» ансамбль икымше лийын, 10-14 ияш коклаште – Оршанке районысо Кугунур школысо «Шонанпыл» йоча образцовый фольклор ансамбль, 14-18 ияш коклаште – Параньга районысо Куракино школысо «Поро эр» ансамбль.

Шернурысо йоча усталык пӧрт – «Йоча прикладной сымыктыш» номинацийыште икымше верыш лектын.

Пайрем годым йоча кид дене ыштыме тӱрлӧ мотор ӱзгарым ончаш да налаш лийын. Тыгак организатор-влак асфальтыште сӱретлыме конкурсышто вийым тергаш, марий модышышко ушнаш темленыт.

А тӱҥ организатор Шернур районысо администраций лийын, тыгак ӱшанле эҥертышым Мер Каҥаш, Туныктыш да шанче министерстве, Тӱвыра, печать да калык-влакын пашашт шотышто министерстве пуэныт. Книга пӧлекым Марий книга савыктышат ойырен.

Вес ийын тыгай «Изи мӧр пеледыш» пайремым Морко район вашлияш кумылаҥын.

Автор: Эльвира Куклина.

• «Изи мӧр пеледыш» вийым пога (видео)