Йоча-влакым аралыме тӱнямбал кечылан пӧлеклалтын (фото, видео)

Йоча-влаклан пӧлеклалтше сылне пайрем 2 июньышто Йошкар-Оласе Чарла Кремльыште эртен. Ты гана поян программым Республикысе марий тӱвыра рӱдер ямдылен. Пайремым «Саскавий» марий ӱдырамаш ушем ден «Ямде лий» республикысе йоча газетат эртараш полшеныт.

Пайремын программыже, мутат уке, йоча жаплан пӧлеклалтын. Вӱдышӧ-влак, йомакысе геройыш савырнен, тӱрлӧ модыш дене модыктеныт. Окси кокай, Агытан да Рывыж икшыве чоныш поро кумылым, шочмо йылме деке йӧратымашым шыҥдараш тыршеныт.

Тыге кеҥеж пагыт, тыныслык нерген муро-влак йоҥгеныт. Теве «Тек эре лийже кече!» мурым марий эстрадын шӱдыржӧ Лариса Сидоркина ден тӱҥалше мурызо, Йошкар-Оласе 2-шо №-ан школын тунемшыже Ольга Денисова пырля шергылтареныт. Тиде муро дене пайремым тӱҥалме да тиде муро почешак мучаште шарым кавашке колтымо.

А шар-влакым «Арт дизайн» фирме ойырен.

Тыгодымак тӱрлӧ модышышто, конкурсышто чолгалыкыштым ончыктышо йоча-влаклан тамле «МАРИ-АЙС» моороженыйым «ЕВРОФУД» ООО кучыктен. Марий книга савыктыш (вуйлатыше Лидия Ильина) да поэтесса Зоя Дудина книга-влакым пӧлеклан пуэныт.

Пайремым Марий Элысе йоча да самырыктукым усталык полатысе «Шокто, гармонь», Йошкар-Оласе 14-ше №-ан гимназийысе «Изи памаш», Йошкар-Оласе 7-ше №-ан школысо «Росинка» ансамбль-влак, ты школынак тунемшыже Александра Катянина, Советский район Ӱшнур школын тунемшыже-влак куштымаш да муро дене сӧрастареныт. Палемдыман, оласе 2-шо №-ан школ гыч ик эн шуко тунемше – 40 наре ӱдыр-рвезе толын. Нуным марий йылмым туныктышо Татьяна Гребнева вӱден конден.

Пайремыш «Марий Юнкор» регион-влак кокласе слётын еҥже-влакат ушненыт.Тиде кечын ик чолга юнкорлан – Татарстан кундем Цыпья школ гыч Софья Анеевалан – «Саскавий» марий ӱдырамаш ушемым вуйлатыше Ираида Степанова марий тӱран топикым пӧлеклен.

Икшыве-шамычым кугыеҥ-влак саламленыт. Поро мутым Марий Элысе тӱвыра, печать да калык-влакын пашашт шотышто министрын алмаштышыже Галина Ширяева, Республикысе марий тӱвыра рӱдерым вуйлатыше Валерий Григорьев, «Ямде лий» республикысе йоча газетын тӱҥ редакторже Лидия Семёнова ойленыт.

Автор: Эльвира Куклина.