Ончылно кок кугу сомыл – «Изи мӧр пеледыш», «Пеледыш пайрем»

Вход на сайт

44690679.png29 майыште Мер Каҥаш вуйверын черетан погынымашыже лие. Тушто Регион-влак кокласе «Пеледыш пайремлан» да «Изи мӧр пеледыш» йоча усталык фестиваль-конкурслан ямдылалтме нерген ойлышт. Мутат уке, кок пайремжат марий йылмым, тӱвырам аралыме да вияҥдыме дене кылдалтын.

«Пеледыш пайрем» нерген Республикысе марий тӱвыра рӱдерым вуйлатыше, Мер Каҥаш вуйвер исполкомын еҥже Валерий Григорьев кумдан каласкалыш. Тений Йошкар-Олаште «Пеледыш пайрем» 21 июньышто лиеш. Тиде пагытыште йӱлашке пурышо кугу мероприятийлан чот ямдылалтыт: кӱлешан еҥ-влакым йыр чумырен, тӱрлӧ шӧрынан пашам шуктат. Теве музыкальный аппаратур шотышто йодыш рашемдалтеш. Кӧ гын сценарийым воза, кӧ гын афишым, буклетым да моло кагаз орам ямдыла… Мер Каҥашын еҥже-влак кокла гыч торасе делегацийлан куратор-влакым палемдышт.

А «Изи мӧр пеледыш» шотышто вуйвер погынымаште исполком вуйлатыше Виктор Иванов мутым кучыш. Тудо палемдыш, тиде фестиваль-конкурс, чынже денак, вийым пога, ынде Шернурышто 4 июньышто регион-влак кокласе семын эрта. Верысе вуйлатыше-влакат пайремын кӱлешлыкшым палат, садланак чыла сомылым Шернур администраций глава Николай Лебедев шкеак терга, пеленже оргкомитетымат чумыра.

Икымше гана «Изи мӧр пеледыш» Советский район Ӱшнурышто лийын. Тудым Ӱшнур кыдалаш школ дирекор, Мер Каҥашын еҥже Валерий Галкин эртараш темлен.

Вуйвер погынымаште моло тӱрлӧ йодышымат тарватышт. Теве чолга еҥ-влак Оршанке районышто марий калык талешке Мамич Бердейын вержым саемдат. Тиддеч ончыч чапкӱм пыштеныт, печым печеныт, каналташ верым келыштареныт гын, ынде пӱям ыштат. Ты пашалан верысе-влак шке кумылын кум тӱжем теҥгем, а Йошкар-Оласе-шамыч 10 тӱжемым погаш палемденыт.

Тыгак Мер Каҥашын тергыше комиссийже нерген мут лекте. Комиссийын шуктышаш пашаж нерген положений проектым ямдылаш кӱлмӧ нерген каласышт.

Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.