Блоггер-влакым куштат

16 майыште Йошкар-Олаште «Марий блоггер-влакын школышт» марий блоггер-влакым ямдылыме республикысе семинар-тренинг эрта. Кызыт кумылан-влак деч йодмашым погат. Тудым www.mari-arslan.ru сайтыште вераҥдыме. Серышым 10 май марте kuklina-10@mail.ru электрон почтыш колтыман.

«Марий блоггер-влакын школышт» проектын авторжо – этножурналист, блоггер Эльвира Куклина. Тудым Республикысе тӱвыра, печать да калык-влак паша шотышто министерствын полшымыж дене «Интеллектуал» тӱвыра-увер рӱдер эртара.
Марий блоггер-влакын школышт шочмо йылмым Интернетыште шарыше марий блоггер-влакым ямдыла. Тӱҥалтышлан 18 ий деч кугурак 10 кумылан еҥым туныкташ шонат.

Школ годым блог дене кылдалтше ик эн тӱҥ йодыш-влакым каҥашаш палемдыме. Кузе Интернетыште оҥай, весымат лудаш, ончаш таратыше аккаунтым ышташ? Кузе блоглан возалтше еҥ-влакым шукемдаш? Блог кӱшеш оксам ыштен налаш лиеш мо? Нине да моло йодышымат рашемдат.

Тыгак «Конфликт гыч лектын моштымаш. Вашмутланымашым чын виктарымаш» теме дене тренинг вуча, да Марий Элын ик эн тале блоггерже-влак дене йыргешке ӱстел лиеш. Тунам национальный блог тӱнян кызытсе кӱкшытшӧ да ончыкылыкшо нерген ойлаш шонат.

Автор: Лемде ӱдыр.