У ТУКЫМ - Провой кундемыште вашлиймаш

Провой кундемыште 17 апрельыште самырык-влак дене вашлиймаш эртен. Тушто Мер Каҥашын еҥже, «ВийАр» мер ушемым вуйлатыше, журналист Алёна Иванова ден МАФУН-ын вице-президентше Василий Петров лийыныт, тыгак чыла гаяк ял шотан илем гыч школышто, ссуз ден вузлаште тунемше да пашаче самырыктукым чумырген.

Йыргешке ӱстелым Мер Каҥашын верысе пӧлкаж ден районысо тӱвыра пӧлка эртареныт. Чолга ӱдыр-рвезе-влак Провой кундемыште илышыш шыҥдарыме тӱрлӧ сынан паша нерген ойленыт: тиде – краеведений, шымлымаш, патриот воспитаний шотышто ятыр сай сомыл.

Алёна Иванова Йошкар-Олаште илыше марий самырыктукымын пашаж нерген каласкален. Тыгак Пеледыш пайрем нерген йодышым нӧлталыныт, вет тений Марий Элын рӱдолаштыже икымше гана ты пайремым эртарымылан 90 ий темеш.

А Василий Петров марий ӱдыр-рвезе-влакын финн-угор мероприятийлаште участвоватлымышт нерген ойлен, тиде кӱкшытыштӧ шукталтше паша радам дене палдарен.

Йыргешке ӱстелыш чумыргышо-влак ялысе ден оласе самырыктукымын умбакыжат кылым кучаш кӱлмыжӧ нерген ойлышт. А Провой кундемыште ӱдыр-рвезе-влак вуйым огыт шупш – тӱрлӧ сай сомылым шуктен шогат, шочмо вер-шӧрымат коден кайышыже шагал. Олаште пашам ыштат гынат, ялыштак сурт-оралтым чоҥат, ешым погат.