«Пеледше тукым» конкурсым иктешлыме (фото, видео)
Вход на сайт
25 мартыште Йошкар-Олаште Йоча да самырык-влакын усталык полатыштышт йоча пагытын, мастарлыкын пайремже гӱжлен. Республикысе «Пеледше тукым» йоча усталык конкурсыш кундемнан 29 йочасадше гыч 156 икшыве чумырген. Чылаже жюри кум номинацийыште 32 номерым ончен. А тиддеч ончыч (4-19 мартыште) Конкурсын икымше этапше чыла район ден олаште лийын: 117 йочасад гыч ик тӱжем наре (946 утла) икшыве 196 номерым ончыктен.
Тыге «Шкетын мурымаш» номинацийыште икымше верым Курыкмарий районысо Кулаково селасе «Кече» йочасад гыч Юлия Космакова сеҥен налын. Кокымшо верым Советский район Кельмаксоласе «Шонанпыл» йочасад гыч Анна Пермякова ден Оршанке посёлкысо «Изи мӱкш» гыч Ксения Черемушкина пайленыт. Кумшо верыш Волжский район Приволжский посёлкысо 2-шо №-ан йочасадыш коштшо Екатерина Владимирова лектын.
«Ансамбль дене мурымаш» номинацийыште сеҥыше-шамыч:
1 вер - Курыкмарий район Пайгусово селасе «Изи мӱкш» йочасад;
1 вер – Шернур район Шӱдымарий гыч йочасад;
2 вер – Волжск район Обшияр селасе «Вис-вис» йочасад;
3 вер – Марий Турек посёлкысо «Вис-вис» йочасад.
«Куштымаш» номинацийыште сеҥыше-шамыч:
1 вер – Провой кундем Краснояр селасе йочасад;
1 вер – Морко посёлкысо 7-ше №-ан йочасад;
2 вер – Оршанке посёлкысо «Изи мӱкш» йочасад;
3 вер – Медведево посёлкысо 2-шо №-ан йочасад.
«Пеледше тукым» конкурс латкокымшо гана эртаралте. Пытартыш жапыште ты проектым Республикысе марий тӱвыра рӱдер Марий Элысе кок (тӱвыра, печать да калык-влак паша шотышто ден туныктыш да шанче) министерстве полшымо дене илышыш шыҥдара. Тений конкурс «Тӱрлемӱдыр» номинацийым ешарыме дене ойыртемалте. Тушко йочан шке кидше дене але кугурак-влакын да ача-аван полшымышт дене тӱрлымӧ 74 тӱрлӧ паша пурен. Нуным конкурс годым посна ончер семын келыштарыме.
«Тӱрлемӱдыр» номинацийыште Йошкар-Оласе 29-ше №-ан «Ший оҥгыр» йочасад сеҥен. Кокымшо верым Медведево посёлкысо 2-шо №-ан «Кече» йочасадлан пуымо, кумшым – Шернур районысо Мустаево школ пеленсе йочасадлан.
«Пеледше тукым» конкурсын эше ик ойыртемже, кӱкшытшӧ - кажне участник мотор деч мотор, икте-весылан келшыдыме марий вургемым чиен. Чынже денак, ӱдыр-рвезе-влак пеледыш гай сылне ыльыч.
Икымше-кумшо верым сеҥен налше-влакым грамот да шергакан пӧлек-влак дене палемдыме, чылаштымат сертификат, таумут да тӱрлӧ пӧлек («Кече-Солнышко» журнал, «Ямде лий» газет, шере пӧлек) вучен.
