Шошо кумылан сылне концертыш мийышна

Вход на сайт

15 мартыште Йошкар-Олаште кок марий эстраде мурызын - Марий Элын сулло артистше Зоя Берникова ден Республикысе марий тӱвыра рӱдерын пашаеҥже Лариса Сидоркинан – «Ӱмыр – ялт шӱвыр» концертышт эртен.
Мурызо-влакым Марий тӱвыра рӱдерын коллективше сылне пайрем дене саламлен да пеледыш аршаш ден пӧлекым кучыктен.

Концерт программым мурызо Валерий Тихонов, «Каче-влак» группо сӧрастараш полшеныт. Зоя Берникован Виктория ӱдыржӧ (Виктория Шабдарова) англичан йылме дене мурым йоҥгалтарен, а Марина ӱдыржӧ (Марина Берникова) «Славянская притча» группо дене пырля рушла мурен. Тыгак Берникован пелашыжат – Владимир Шабдаров – ончышо-влакым руш эстраде муро дене куандарен.

А мурызо Лариса Сидоркинан Татьяна ӱдыржӧ (Татьяна Соколова) флейте дене да Марина ӱдыржӧ (Марина Сидоркина) скрипке дене шоктеныт, Геннадий пелашыже мурен.

Тыгак каслан сылне ямым пуртеныт шӱвыр сем – тудым музыкант Сергей Пчёлкин шоктен, да «Марий Эл» кугыжаныш семӱзгар ансамбль (вуйлатыше Марий Элын сулло деятельже Владимир Смирнов) кумылаҥден.

Усталык касым РФ-ын сулло да Марий Элын калык артистше Маргарита Медикова вӱден. Тудо муро коклаште почеламут-влакым сылнын лудын, илыш, пӱрымаш, лишыл еҥ-влак нерген шонкалаш таратен.

Тӱрыснек кас шошо кумыл гаяк ласкан да волгыдын эртен.

Автор: Эльвира Куклина.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.