«Пеледше тукым» кажне районышто уло (фото, видео)

Шошо тылзын икымше пелыштыже Марий кундем мучко йочасадыш коштшо икшыве-влак «Пеледше тукым» усталык паша конкурсышто таҥасат. Тыгай конкурс кажне районым авалта да 25 мартыште Йошкар-Оласе Йоча да самырык-влакын усталык полатышышт иктешлалтеш.

Республикысе «Пеледше тукым» йоча усталык паша конкурс кодшо курымын 90-ше ийлаштыже шочын. Тудым ончыч Йошкар-Ола кӱкшытыштӧ Туныктыш да шанче министерстве ыштен, вара таҥасымаш кумдаҥын, регион кӱкшытыш лектын. Ынде Марий Элысе тӱвыра, печать да калык-влак паша шотышто ден туныктыш да шанче министерстве-влак да Республикысе марий тӱвыра рӱдер пырля эртарат. Тидлан лӱмынак «Марий Элым этнокультурно вияҥдымаш» республикысе программе почеш шийвундо ойыралтеш. Тыге сеҥыше-влакым сай пӧлек-влак вучат.

«Пеледше тукым» конкурс кок ийлан ик гана лиеш да школлаште тунемше-влакын «Самырыктукым» усталык конкурсышт дене икте-весыштым алмаштат: ик ийын – ик таҥасымаш, вес ийын – весыже. Чыла тиде сем тӱня дек мелын улшо уста йоча-влакым пален налаш, куштымо да мурымо мастарлыкым шуараш, марий калыкын культурыж дене кугешнаш да тудым пагалаш тараташ манын ышталтеш.

Тенийысе «Пеледше тукым» таҥасымашын тӱҥ ойыртемже – у «Тӱрлемӱдыр» номинацийыште йоча мастарлыкым тергымаш. Шке кид дене ыштыме тӱрлӧ арверым выставкыште ончыктат. Тыгодым жюри мотор марий вургемыштым, марий тӱрым онча.
Тӱрыс конкурсым иктешлен, сольно да ансамбль дене сеҥыше-влакым кум номинаций дене суапландараш тӱҥалыт: «Сем мастарлык (мурымаш)», «Куштымаш», «Тӱрлемӱдыр (тӱрым тӱрлымаш)».

Палемдыман, «Пеледше тукым» конкурсын тӱҥалтыштыже тыгай палыме да пагалыме еҥ-влак шогеныт – тиде Зоя Константиновна Иванова, Людмила Ивановна Кошкина да молат. Людмила Кошкина тачат Марий тӱвыра рӱдерын ик пӧлкажым вуйлатыше семын ты мероприятийым эртарымаште чот тырша. Рӱдерым вуйлатышын алмаштышыже Римма Юрьева дене пырля кажне районыш лектын коштыт, эн мастар, чулым йоча-влакын номерыштым ойыраш полшат.

«Пеледше тукым» конкурсын икымше этапшым 19 мартыште Йошкар-Оласе 29-ше №-ан йочасадыште мучашлат.

Автор: Эльвира Куклина.