ТӰВЫРА - Йошкар-Оласе ик аптекыште марла ойлат!

«Мый марла ойлем» акций нерген колалтын, векат. Тудо апрельыште Марий талешке кече гутлаште Йошкар-Олаште лиеш. А теве «Авиценна-7» аптеке (Йошкар-Ола, йолчием фабрике воктене верланен) тыгай акцийым кажне кечын эртара . Кузе?

Йодышланна вашмутым аптекым вуйлатыше, Шернур район Лажьялын ӱдыржӧ Эльвира Аклина пуыш. Тудак сай шонымашым илышыш шыҥдараш пижын. «Мемнан деке ятыр марий еҥ коштеш. Нунын дене эреак марла ойлаш тыршена. Тидыже угыч да угыч мемнан деке толаш кумылаҥда», - ойла Аклина.

Таче (15 апрельыште) аптекыш мийымем годым Эльвира лачак налын ямдылыме марий сувенир-влаклан верым палемда ыле. Тыгак тудо кушко да эше могай марий сыным аптекыш пурташ кӱлмӧ нерген каласкалыш. Марий ӱдырамашын ойлымыж почеш, ончыкшым пашаеҥ-влакын ош халатыштат марий сынан лийшаш.

А аптекыште кок фармацевт тырша: Фарида - Морко район гыч марий ӱдыр, да Наташа – Йошкар-Ола гыч – марлаже ок кутыро, но марла ойлымым умыла.

Тиде аптеке нерген уверым «Марий сувенир» киосклаштат муаш лиеш, а «Авиценна» аптекыште кушто марий сувенирым налаш лийме нергенат умылен кертыда. Тыге икте-весылан полшен, марий йылмым арален да вияҥден колтымашке, чолга марий талешкына-влак надырым пыштат.

«Авиценна» аптеке-влакым кучышо оза-влакат ты акцийын кӱлешлыкшым умылат. Мийыза йолчием фабрике воктенсе «Авиценна» аптекыш – тендам порын да марла пелештен вашлийыт!!!