Ӱярня пайрем нерген фото, видео, тӱрлӧ увер

Марий йӱла почеш Ӱярня шочмын пура, руш йӱла почеш - рушарнян. Тыге марий калык 2014 ийыште Ӱярня пайремым 24 пургыж (февраль) гыч тӱҥалын 3 ӱярня (март) йотке палемда.

Ожно Ӱярня пайрем годым ӱярня курыкым ыштеныт, ӱярня кашташте - вес семынже йолкурыкышто - мунчалтеныт. Тыгаят лийын: пайремым ужатыме годым ломаш варашке уржа кылтам пижыктеныт да йӱлатеныт. Тыгодым "Ӱярня каен" манын кычкыреныт. Ӱдыр-рвезе-влак тулото гоч тӧрштылыныт, шкеныштым шинчавочмо, локтымо да чер деч аруэмденыт.