Шинчымаш - Марий мер рӱдер Татарстанын ик ялыштыже лиеш!

Мари-Суксы села Татарстан республикын Актаныш районыштыжо верланен. 154 суртан ялыште кыдалаш шинчымашым пуышо марий школ уло. Тиде – пӱтынь районланат ик марий школ.Тушто 65 йоча тунемеш.

Марий кумылан, шке йылмыжым да калыкшым йӧратыше да пагалыше Эдуард Амирянович Галиев ты школым ынде икмыняр ий вуйлата. Тудын палемдымыж почеш, Мари-Суксы ялыште лишыл жапыште (23 июнь (Семык пайрем годым) гыч 1 сентябрьыш) Марий мер рӱдерым почаш шонат. Ты рӱдер школым, клубым, ялысе библиотекым, йочасадым иктыш уша. Кызыт рӱдерлан ойырымо пӧртым олмыктат.

Палемдыман: Мари-Суксы школ пелен нылле утла еҥан «Ший памаш» калык фольклор ансамбль уло. Тудым Ирина Робинзоновна Миникаева вуйлата. Тушко кугыеҥжат, йоча-влакшат уло кумылын коштыт. Галиевын ойлымыж почеш, ансамбльыште ныл тукымым ойырен каласаш лиеш: коча-кова, ача-ава, школышто тунемше йоча-влак да йочасадыш коштшо ньога-шамыч.

«Ме Татарстан республикысе тӱвыра министерствын грантшым сеҥен налынна. Тудо окса ансамбльлан у костюмым ургаш, семӱзгарым уэмдаш да шочмо селана нерген книгам савыкташ ойыралтеш», - каласыш школ вуйлатыше.

А марий костюмым ургаш да тудым марий тӱр дене сылнештараш Марий Эл гыч тӱрлызӧ, амалкалче Ираида Александровна Степановалан ӱшаненыт.

Эше иктым ойыренак палемден кодымо шуэш: Мари-Суксы школышто тӱҥалтыш класслаште чыла предметымат марла тунемыт, чынрак лияш гын, туныктышо-влак кеч-могай урокыштат марла умылтарат. А 5-11 класслаште чыланат марий йылмым да литературым келгын тунемыт. Вот сай да кӱлешан пример! Нигӧ дене ӱчашыде, нимом доказатлаш тыршыде, нимолан ӧпкелалтде, шке семынышт, ласкан гына марий йылме деке, марий тӱвыра деке икшыве-влакым шӱмаҥдат! Пашада ушнен толжо, кумылда эре нӧлтшӧ лийже!!!

Автор: Эльвира Куклина.

PS: Сайтысе материалым вес вере кучылтмо годым «Арслан» интернет-журналыш ссылкым ончыктыман!!!