УВЕР - "Марий сандалык" у номерым темла

Вход на сайт

«Марий сандалык – Марийский мир» журналын тенийысе икымше номерже лектын.

Марий Эл да марий калык дене кылдалтше информаций-аналитике журналыште ты гана здравоохранений йодышым нӧлталме, марий парламентын эртык корныжым шергалме, Изи Какшан серыште (Ружбелякыште) илыше калык нерген каласкалыме.

Марий йӱла дене кылдалтше икмыняр материал уло. Мутлан, Турек пазар нерген,Шернур велсе Ӱярня нерген.

А Коҥга пазар пайрем нерген «Саскавий» у лаштыкыште лудаш лиеш. Пайрем Кужэҥер кундем Чодраялыште эртен. Тушко «Саскавий» марий ӱдырамаш ушемын еҥже-влак миеныт.

Тиде лаштыкыштак Ушемын вич ияш пашажым иктешлыме, эмлызе Маргарита Тойшева нойымо чер деч ой-каҥашым пуа, Пошкырт кундем Мишкан районышто эртыше «Саскавий» моторлык конкурс нерген ойлалтеш, Марий АССР Министр-влак Совет председательын алмаштышыже Алевтина Шорникова нерген моткоч шергакан статьям темлат.

Журналыште эше ик КУГУ букван, сылне марий ӱдырамаш, талантан актрисе Маргарита Медикова нерген лудаш лиеш.

Оҥай да кӱлешан «Икымше тренер» статья. Тудо Кужэҥер район Коҥганур школышто тренерлан тыршыше Вячеслав Еменгулов нерген каласкала.

Шонаш тарата «Как советчане потеряли красоту» материалат. Тиде - журналист шымлымаш. А йодышыжо тыгай: кушко да молан йомын Советский посёлкышто шогышо да марий ӱдырамашым символизироватлыше памятник?

«Марий сандалык» журнал моло материалланат поян. Лудса, аклыза!

Тӱрыс журналым тыштат лудын кертыда - http://mer-kanash.ru/

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.