ТӰВЫРА - "Марий мурсем" пеш кертеш!

29-31 мартыште Ульяновск олаште Куштышо коллектив-влак коклаште кундем кÿкшытысö VIII почылтшо «Симбирские выкрутасы» конкурс эртен. Тушто Марий кугыжаныш университетын «Марий мурсем» студент фольклор ансамбльже шке мастарлыкшым ончыктен да кокымшо верым сеҥен налын.

29 мартыште МарГУ-н студентше-влак «Апельсин» гостиницыш илаш пуреныт, а кастене Губернатор полатыш «Симбирские выкрутасы-2013» конкурсым торжественный почмаште лийыныт. Тунамак куштышо калык коллектив «Симбирские узоры» ансамбльын (вуйлатыше Г.Митязова) лӱмгече касше эртен.
Вес кок кечын конкурстант-влак таҥасеныт. Тыште марий студент ансамбль шкенжым моткоч сайын ончыктен. Коллективын кураторжо да жюри член-влак «Марий мурсем» ансамбльым моктен ойленыт. Ÿдыр-эрге-шамыч тошто марий да курыкмарий куштымаш-влакым ончыктеныт. Гала-концертыш тошто марий куштымашым ойырен налыныт.

31 мартыште лÿмынак «Марий мурсемыш» коштшо ÿдыр-рвезе-влаклан Ульяновск оласе краеведческий тоштерыште экскурсийым эртареныт. Тиде кечынак конкурсым иктешленыт.

Тыгай куштымаш пайремым Ульяновск областьысе тÿвыра политик да сымыктыш министерство ден Калык тÿвыра рÿдер пӧлекленыт. А конкурсышто Ульяновск кундем, Сызрань да Марий Эл гыч чылаже нылле наре коллектив шке мастарлыкшым терген.

Автор: Людмила Карпова.