Шорыкйол пайремым пайремледа?

2018 ий 5-12 январьыште Шорыкйол арня эрта. А таче тиде пайремым пайремледа?

Кристина Силина:
Чаманен каласаш логалеш, Шорыкйол пайремым изи годым вел пайремленна, молан манаш гын тунам ялыште шуко йоча лийын, чылан тиде пайремым вученыт. Кызыт чылан кушкын пытеныт, а кызытсе йоча-влаклан тиде оҥай огыл. Изи годым «бовайын» вургемжым чиена ыле да, ик гана огыл, кум гана коштына ыле. Шукын лиймылан кӧра мемнам суртоза-влак пален огыт. Кызыт ялыште Шорыкйоллан огытат лек. Мыйын шонымаште, тиде Пайремым ончыкыжым шуараш кӱлеш, вет тиде пайрем поро, волгыдо да весела.

Эдуард Оразаев:
Тачысе кечынат Васли мӧчӧр семын чиен коштына, пӧрт еда пӱкшым погена. Уремыште иктажым вашлийына гын, лумыш урена, таҥасена, кӧ кӧм сеҥа.

Вероника Мустаева:
Шорыкйол нерген изи годсо шарнымаш веле ушеш кодын. Шарнем, ковам лӱмын шылкогыльыш тӱрлым шылен опта ыле: окса - поянлыклан, шоган нелылыклан, кампетке - лачка илышлан. Ой! Ну чот куанена ыле шӱжарем дене, кунам окса логалеш мыланна. Ковайже шылтенжат эн шукыжо оксам веле, а могай куанже мыланна лийын. Тыгак ушмен кыч пӱкшым коҥгаште «васли кува-кугызалан» (мӧчӧр-влаклан) ыштен ямдыла ыле. Уна-влак пӧртыш толын пурымышт годым лӱдмем дене вес кыдежыш шылын возам ыле. Ик гана Шорыкйол кастене лумыш шурымышт деч вара чотак лӱдаш тӱҥалынам, кеч лумыш урышо айдемыжымат паленам. Кугурак лиймек, толшо-влакым чурийышт, йӱкышт гыч пален налаш оҥай ыле. Тидланже шукырак мурыктенна, куштыктенна.

Виталий Иванов:
Шорыкйол пайрем, мыйын шонымаште, - пеш оҥай пайрем. Кажне суртышто тиде пайрем ончыч руаш гыч пӱкшым ямдылат, мӧчерым вучат. Ял калык мӧчер вургемым чиен, сурт еда коштыт. Изи йоча-влак кас марте уремыште модын куршталыт.

Валентина Чемышева:
Мый Шорыкйол пайремым аклем. Жапыштыже шкеат Васли кува-кугыза (мӧчӧр) лийын коштынам. Ме, шукын погынен, пӧрт еда мурен-курштен, веселан жапым эртарен коштмо. Чаманен каласыман, кызыт тыге кошто шагал.

Вероника Мустаева мутланен.

• Шор-йол (Шорыкйол) – марийын ик эн кугу пайремже

• Традиции и обычаи