Анна Санникова – «Тавриде» конкурсын сеҥышыже

Google Tilt Brush программын йöнжö моткоч кумда. Сÿретлымаш у тÿс да моткоч шуко йöн дене пойдаралтеш. Ушышто да тÿня кумдыкышто модель шочеш. Тыгай сÿретлыме верыште куштылгын ик верым весе дене вашталташ, объектым тÿрлö ончалтыш дене войзаш лиеш. Тыгай вучыдымо оҥай технологийым пÿтынь Российысе «Таврида-2017» туныктыш форумышто Йошкар-Ола гыч самырык сÿретче да туныктышо Анна Санникова ончыктен.

Анна Санникова проектше нерген тыге ойла: «Мый педагог семын студент-влак дене туныктымо пашам оҥайракым да сымыстарышым ышташ шоненам. Вучыдымын виртуальный манме чынлыклан келшыше шлем да Google Tilt Brush программе дене тÿкненам. Тудын полшымыж дене тÿссымыктыш произведенийлам виртуал илышыште шочыкташ лиеш. Программе дене лишкырак палыме лиймеке, туныктымаштат кучылташ шонен пыштенам. Тыге мыйын проект шочын».

Куд шагаташ у курсым Анна студент коклаште кеҥеж практике жапыште эртарен да тудын кÿлешлыкшым сайын умылен. У йöн моткоч пайдале - пÿртÿсыштö сÿретлымаш годым пространственный манме шонкалымашым пÿсемда, а тидыже тÿҥалше сÿретче-влаклан поснак кÿлешан. Пырля ыштыше туныктышо-влак Аннан пашажым кÿкшын акленыт, садлан тудо проектым возен. У шонымаш эксперт-влакланат келшен. Форум гыч шке пашажлан Анна кок шÿдö тÿжем теҥге грантым конден.

Анна Санникова: «Таврида» форумын эксперт комиссийжылан мый шке проектемым ончыктенам. Нуно пашамлан кÿкшö акым пуэныт, кÿлешлыкшым, у сынжым палемденыт. Грант окса тÿҥалме пашашкем шукырак студентым ушаш, занятийым оҥайын эртараш полша манын, шонем».

Программын паша йöнöо моткоч кумда да ҥнай. Сÿретче тыглай чия да кисточке дене гына огыл пайдаланен кертеш. Тудо сÿретшым тул, лум, йÿлышö да вашталтше чия да шÿдыр дене шочыктен кертеш. Шочыктымо сÿрет вашталт кертеш, вержым вашталта, шукемеш… Шеҥгел радына семын сандалыкым, шÿдыран кавамат ончыкташ лиеш.

Теве Юлиан Агачев, Йошкар-Оласе художественный училищын студентше, палемда: «Кенеж практике жапыштына Анна Андреевна мемнам виртуальный реальность клубышко коштыктен да у семын сÿретлаш туныктен. Сÿретлен ончышым да умылышым, чонемлан тиде моткоч келша - вет мом гына ышташ ок лий! Мый кызыт тиде йöн дене «Портал-2» компьютер модыш гыч ужашым сÿретлем. Моткоч оҥай, умбакыжат тиде йöным кучылташ тÿҥалам».

Анна Санникова шкежат Йошкар-Оласе художественный училищым тунем пытарен, вара Суриков лÿмеш инстиутытшто шинчымашым налын. Шочмо кундемышкыже пöртылмеке, туныктышылан пашам ышта. Тений сÿретчын «Илышын книгаже» лÿман икымше ончерже лийын. Виртуал сÿретче лияш кумылда лектын гын, тиде йöн оҥайын чучын гын, Анна Санникова тендам уло кумылын вуча.

Автор: Ирина Павлова.
#МариАрслан #Кидмастар #НКО #ИНТЕЛЛЕКТУАЛ #Рукодельница #Мастернавсеруки
#ЦентрРазвитияГармонии #ИлышКуан #РадостьЖизни #РесурсныйЦентр
#МарийЭл #ЙошкарОла #Кидмастар_Рукодельница