Чÿкшö курыкыш куржын кÿзаш

Вход на сайт

2017 ий 20 майыште Марий Эл Республикысе Морко районын Чÿкшö курыкыштыжо куржталмаш нылымше гана эртыш. Акцийыш 117 еҥ (ÿмаште – 124 еҥ) чумырген. «Саскавий» марий ÿдырамаш ушемын ежҥе-влакат миеныт. Нунын кокла гыч Маргарита Тойшева курыкыш куржын да шке ийготан-влак коклаште кокымшо верыш лектын.

Тиде кечынак «Чÿкшö курык: теҥгече, таче, эрла» усталык конкурс иктешлалтын. Конкурсышто 32 еҥ вийжым терген, тышеч – 9 йоча. Нурÿмбал школын руш йылмым туныктышыжо Людмила Рыбакова кажне номинацийыш ушнен, сеҥышыш лектын.

Татьяна ден Сергей Пчёлкинмыт шинчавÿдым лукташ ситыше виян гимным возеныт. «Муро» номинацийыште икымше верым сеҥен налыныт. Почеламутым профессионально возышо-влак коклаште Йошкар-Оласе Морко землячестве поэтессе Мардан Раям палемден.

«Саскавий» шке призшым Нурÿмбал школ гыч Ирина Кузьминалан кучыктен. «Кураня» ден «Ямде лий» газет-влакат полек дене миеныт, саламленыт.

Спонсор-влакым Семисола поселений кычалын. Тыге поро чонан предприниматель-влаклан кугу тау.

Туштак шахматла, волейболла модыныт. Чыла участник ден уна-влаклан пучымышым, пловым, шурым пукшеныт. Тамле кочкышым кÿ карьерын поварже Лидия Соколова шолтен. Пучымышым Нурÿмбал школ шолтен кÿзыктен.

Спорт да сылнымут пайремым пеш сайын эртареныт. Кечат кава гыч калыкым куанен ончен, мотор игечым колтен.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.