Сылнымутышко самырык вий ушна

Марий Эл Республикысе Писатель ушемын эртарыме Республиканский самырык сылнымут конкурсыш кудымшо гана кундемнан тÿрлö луклаштыже илыше самырык автор-влак погыненыт ыле.

Икымше гана тыгай конкурсым 2011 ийыште эртарыме. Сылнымут конкурсым кажне гана иктаж-могай гынат лÿмгечылан пöлеклена. Икымше конкурс Марий автономийын пролетар писатель ассоциацийым ыштымылан кандашле вич ий темме лÿмеш ыле. Ончылий «Кече-Солнышко» журналын шочмыжлан кандашле вич ий теммылан пöлеклыме. Ӱмаште конкурс марий писатель Яныш Ялкайнын шочмыжлан шÿдö лу ий темме лÿмеш эртаралтын. А тений ме тиде пайремым марий поэт Чалай Васлийын шочмыжлан шÿдö ий темме лÿмеш пöлеклышна. Кажне гана конкурсышко тÿрлö школ гыч талантан ÿдыр-рвезе-влак ушнат. Эн сай произведений-влакым «Эрвий» да «Дружба» альманахлаште, тÿрлö тÿшка сборникыште савыктыме. Тыгак республикыште лектеден шогышо изданийлаште савыктыме. Произведений-влакым «Пеледалт мландем – Цвети, мой край», «Самырык вий – сылнымутышто – Молодая сила – в литературе», «Молан рывыж кужу почан?», «Волгыдо олык тÿрыштö» сборниклаште лудаш да аклаш лиеш.

Ты гана конкурс заочно да очно кыдеж дене эртен. Чылаже 93 участник дечын шуко паша жюрин ÿстембакыже возын. Йошкар-Олашке чыла участникшак толын кертын огыл. Но ятырын сылнымут пайремыште шке мастарлыкыштым ончыкташ сайлан шотленыт. Каласен кодыман, туныктышо-влак тунемше-влак дене кугу пашам эртареныт, чыланат манаш лиеш, шке сылнымутыштым наизусть тунемыныт да погынышо-влак ончылно изи артист гаяк койыныт. Самырык возкалыше-влакым Марий Эл Республикысе тÿвыра, печать да калык-влакын пашашт шотышто министрын алмаштышыже Галина Ширяева саламлен, чапле сылынмут паша лектышым тыланен.

Республикысе школлаште ятыр юнкор да сылнымут кружок пашам ышта. Шернур район Купран школышто Зинаида Ильинична Антропова, Марисола школышто – Светлана Мартыновна Максимова, Шÿдымарий школышто – Софья Федотовна Рыбакова, Волжский район Пöтъял школышто Лидия Викторовна Кошаева, Карай школышто – Надежда Дмитриевна Ильина, У Торъял район Токтарсола школышто – Раисия Леонидовна Петухова, Медведево район Руэм школышто – Галина Валентиновна Шалаева ден Анна Модестовна Захарова, Морко район Коркатово лицейыште – Вячеслав Емельянович Смирнов, Советский район Кодам школышто – Зоя Александровна Беляева, Медведево гимназийыште Римма Ивановна Чендемерова да молат тыршат.

Конкурсышто ÿдыр-рвезе-влак шке произведенийышт дене палдареныт. Изирак, кыдалаш, кугурак ийготан группылан шеледыме «Поэзий» да «Прозо» номинацийлаште автор-влаклан дипломым, книга пöлекым кучыктымо, а туныктышо-влаклан тÿвыргö пашам вÿден шогымыштлан Тауштымашан серышым пуымо. Саламлымашке Марий книга савыктыш (директоржо Юрий Соловьёв) ушнен. «У сем» журналын тÿҥ редакторжо Людмила Ягодарова ойыртемалтше участник-шамычлан книга пöлекым кучыктен.

Самырык автор-влакын произведений-влакыштым тÿрлö изданийыште савыкталташ тÿҥалыт.

Автор: Светлана Архипова.
#МариАрслан #поэзия #культура #искусство #творчестве #МарийЭл

• Сылнымут
• Тӱвыра увер
• Новости культуры
• Афиша