100 ий гыч кӧ мемнам палаш тӱҥалеш?..

Вход на сайт

2013 ий 28 мартыште "Йыван Кырла лудмаш" научно-практический конференций кумшо гана эртен.Ты гана аспирант, шымлызе, тӱвыра да мер пашаеҥ, журналист-влак Шернур район Марисолаште чумыргеныт да "Калык тӱвыра да самырыктукым" темым тарватеныт.

Пленар погынымаште вич доклад йоҥген. Лӱмлӧ киноактёр да поэт Йыван Кырлан илышыже да усталык пашаж дене Руслан Бушков да Марина Хабалева палдареныт. Самырык-влак коклаште марий тӱвырам шыҥдарыме нерген Никандр Попов, Родион Чузаев да Алёна Иванова ойленыт.

А.Иванова шке докладыштыже иктешлен: «Калыкнан ончыкылыкшо волгыдо да пеҥгыде лийже манын, ме ик еш семын ваш умылен, пагален, эҥертыш лийын илышаш улына. А калык тунам шке тӱсшым огеш йомдаре, тунам шке культурыжым арален кода, кунам тудын ончыкылык тукымжо ушан-шотан, келге шинчымашан лиеш. Тыгай еҥ калыкын эртыме корныжым жапла да вожылдегече каласен кертеш: «Мый марий улам!».

Конференций годым куд секций пашам рӱж ыштен. Теве кудымшо «Калык тӱвыра алан да самырыктукым» секцийыште "Саскавий" марий ӱдырамаш ушемым вуйлатыше, тӱвыра, печать да калык-влак кокласе паша шотышто министрын алмаштышыже Галина Ширяева выступатлен. Тудо самырыктукымым калык тӱвыра шӱлышеш куштымаште «Саскавий» ушемын рольжо нерген ойлен.

«Марий ӱдырамаш-влак у, кушкын толшо тукым нерген шонат, вет тудын деч калыкын ончыкылыкшо шога. Могай алмаштышым куштена, тугаяк лиеш марий калыкын эрласе кечыже. Тидым шотыш налын, «Саскавий» шке мероприятийлашкыже эреак самырык-влакым ӱжеш, нунын дене посна вашлиймашымат эртара. Теве Марий самырык театрын шындыме «Ава шӱм» (Валерий Григорьев) спектакльже деч вара моткоч оҥай да кӱлешан мутланымаш самырык ден илыш сапым ятыр ий виктарыше-влак коклаште лийын. Ӱмаште эмлызе ӱдырамаш-шамыч Марий кугыжаныш университетын студентше-влак дене вашлийыч да «Таза тукым – таза калык» теме дене мутланымашым эртарышт. Тыгак ме кажне ийын икымше июньышто марий йоча-влакым иктыш чумырен, нуным тӱрлӧ марий модыш дене модыктена, марла мурыктена-куштыктена», - палемдыш Г.Ширяева.

Конференций «Марий Элым 2009-2013 ийлаште калык тӱвыра шотышто вияҥдымаш» республикысе целевой программе кышкарыште эртен. Тудым Тӱвыра министерстве, Шернур администраций, В.М.Васильев лӱмеш МарНИИЯЛИ эртарен колташ полшеныт.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.