Ме огыл гын, кӧ?

Чебоксар олаште «Йылме фестиваль» 2016 ийыште 21-ше гана эртаралте. Тушто тӱрлӧ йот да пошкудо калыкын йылмыжым тунемаш лиеш. А молан нине йылме коклаште марий йылме уке? Мо дене тудо уда моло деч? Нимо денат! Мӧҥгӧшла – пеш сылне. Тудым чылан палышаш улыт! Лач тыгай шонымаш дене кокымшо ий почела тиде фестивальыш марий йылме дене палдараш Анна Васильева ден мый, Вероника Мустаева, мийышна.

Кодшо ийын тиде фестивальлан коло ий темын, садлан йылмым кок кече тунемме. Тений – ик кечым гына ойыреныт. Туге гынат, йылмым йӧратыше-влак шагал огыл лийыныт. Тунемаш темлыме йылмыжат нылле утла лийын: япон, итальян, португал, эсперанто, немыч, англичан, хинди да т.м. Кажне толшо ойырен налме йылме дене палыме лийын кертын, кушеч иктыже – марий йылме. Мемнан урокышкына шым еҥ толын. Тиде шукыжак огыл, туге гынат марий йылмым палаш шонышо-влак миеныт.Толшо-влак кокла гыч шукынжо шке шочмо йылмышт дене икгайлыкым кычалыныт, таҥастареныт – тидыже куандара. Тыгак калык йӱла дене палдарыме годым икгайлык ден ойыртемым рашемдыме. Тунемше-влак шукырак пален налаш кумылан лийыныт. Чаманен каласыман, жап шагал лийын. Ӱшанен кодмо шуэш, нуно марий йылме деке кумылаҥыныт, тунемаш шонышо-влакат лектыт.

Тыге, кокымшо ий марий йылме тӱнямбалсе тунемме йылме-влак дене таҥаса. Марий йылме дене кутырышо-влак шагалем толыт гынат, мемнан нерген палышаш улыт. Пален налын, марий йылмым тунемаш кумылан-влакат шукемыт манын ӱшаныме шуэш. Тидыже мыланна, ончыкылык туныктышо-влаклан, моткоч куанле лиеш. Самырыктукым да ончыкылык туныктышо-влак огыл гын, кӧ марий йылмым ончыкыжо шуаш тӱҥалеш? Чыла мемнан кидыште!

Автор: Вероника Мустаева.
Фотошто: марий туныктышо ден тунемше-влак.
#МариАрслан #самырыктукым #культура #искусство #марикалык
#мари #йошкарола #МарийЭл

• Сылнымут
• У ТУКЫМ
• Тӱвыра увер