Республикыштына «Ӱдырсий» конкурс икымше гана эртен

Самырык еҥ чыла могырымат чулым лийшаш, уш-акылжым пойдарышаш, тӱрлӧ могырым шуаралтшаш. Тыгерак мемнан самырак этножурналистке Анастасия Галиева шке вийжым конкурслаште терга.

29 октябрьыште 2016 ийыште Йошкар-Олаште «Ӱдырсий» республикысе икымше конкурс эртен. Конкурсантке-влак шке мастарлыкыштым, вийыштым, моторлыкыштым ончыктеныт.

Икымше конкурсышто ӱдыр-влак «Ӱдырсий» йӱлам ончыктеныт, кузе тудо ончыч эртаралтын. Тыгодымак муралтеныт, кушталтеныт, почеламутым лудыныт, шиялтыш дене шоктеныт, жюри ден ончаш толшо-влакым тамле пура да мелна дене сийленыт.

Умбакыже ӱдыр-влакын уш-акылыштым тергеныт, марий калык, марий йӱла дене кылдалтше йодыш-влакым пуэденыт. Каласен кодыман, ӱдыр-влак марий йӱлам палат, аралат да пагалат.

Ончаш толшо-влакым «Этномода» конкурс ӧрактарен, ӱдыр-влак, мотор деч мотор марий тувырым чиен, сцене дене кайыкла ийыныт.

Туге гынат кеч-могай конкурсыште сеҥыше лийшаш, гран-при дене Кужэҥер районын чолга ӱдыржӧ Полина Савельева палемдалтын. Тӱрлӧ номинациыйштат сеҥыше-влак лийыныт. Дарья Иванова (Морко р-н) «Марий йӱлам аралымаште» диплом ден палемдалтын, Анастасия Галиева (Татарстан кундем) «Интернет марий ӱдыр», Анастасия Царегородцева (Провой кундем) «Мурызо марий ӱдыр», Любовь Михайлова (Татарстан кундем) «Эн ныжыл марий ӱдыр», Лариса Ипулаева (Пошкырт кундем) «Лывырге марий ӱдыр» диплом дене палемдалтыныт.

Тыгак, касым Станислав Устюгов, Светлана Яндукова, «Марий памаш» ансамбль сӧрастареныт.

Конкурс нерген ӱдыр-влакын шонымашышт.

Полина Савельева (гран-при):

- Мыйын шонымаште, ӱдырсий конкурс кӱлешан. Молан манаш гын, йÿлам арален кодаш, тыгак у тукым пален шогыжо манын, эртарыман. Конкурслан арня утла ямдылалтме. Сценарийым возымо, модшо-шамычым кычалыме, шкеяк пурам шолтымо, мелнам ыштыме. Ончыч нимогай тургыжланымаш лийын огыл. А конкурс кечын кид чытыраш тÿҥале, мом да кузе ыштыман, нимом мондаш огыл манын, эреак шонен коштым. Сеҥем манын, шоненат омыл. Пеш чот тидлан куаненам.

Лариса Ипулаева («Лывырге марий ӱдыр»):

- Ӱдырсий конкурс мылам пеш чот келшен. Конкурсшо неле лийын огыл. Кызытсе илышыште тыгай конкурс-влак кӱлыт, молан манаш гын йÿла-шамыч эркын гына мондалт толыт, тидлан кӧра тыгай конкурс-влакым эртараш кӱлеш шонем.

Автор: Анна Васильева.
#МариАрслан #самырыктукым #культура #искусство #марикалык
#мари #йошкарола #МарийЭл