Калтаса районышто - «Муроҥгыр» марий муро пайрем

Вход на сайт


Мотор шöртньö шыже кечын Пошкырт кундем Калтаса район Ӱлыл Качмаш клубышто районысо марий автор-влакын икымше муро конкурсышт эртен. Пайремыш марий мурым йöратыше, тудым перегыше еҥ-влак погыненыт.

Мурызо-влакын мастарлыкыштым жюри аклен. Тудым верысе «Эрвел марий» национально-культурный автономийын правлений вуйлатышыже Инна Тимиряева вуйлатен. Тыгак мурызо да автор-влакын кÿкшытыштым тÿвыра пöлкам вуйлатыше Зелина Шамсутдинова, «Калтаса ÿжара» газетын тÿҥ редакторжо Виталий Акиев, шинчымаш пöлкан пашаеҥже Филлип Петраев, мурышо калык ансамбльын аккомпониаторжо Александр Шипаев акленыт.

«Сылнымут аршаш» номинацийыште Чап кагаз дене суапландаралтыныт: Валентина Кумушбаева (Кутерем села) – I вер; Григорий Ибакаев (Павасола ял) - II вер; Геннадий Тимиряев (Кугу Агытан ял) - III вер.

«Ныжыл сем» номинацийыште палемдалтыныт: Геннадий Тимиряев, Валентина Кумушбаева, Валентина Гиздельханова (Краснохолмский села).

«Куандарыше сем» номинацийыште: Григорий Ибакаев, Виктор Ванюшкин (Калтаса села), Андрей Петраев (Амчемучаш ял).

«Шÿм гыч лекше сем» номинацийыште Лиана Миннуллина (Нефтекамск ола), Тамара Кильмаева-Исангулова (Калмаш ял) палемдалтыныт.

Мурышо ансамбль-влак кокла гыч Кельтей ял гыч «Умыр кас» (Малина Ислаева вуйлата), «Ший онгыр» мурышо калык ансамбль (Валентина Гиздельханова вуйлата») ойыртемалтыныт. Тыга Павасола ялын «Арка марий» мурышо дуэтшым (Григорий Ибакаев) калык совым рÿж кырен вашлийын.

«Районысо «Муроҥгыр» икымше конкурсыш толшо марий автор-влакын мурыштым чумырен, дискым да книгам лукташ шонена. Тугак виян да сылне муро-влакым Марий Эл радио эфирыш лукмо шот дене тÿҥ редактор Володя Матвеев дене кутыренна», - ойла икымше муро пайремым эртараш кугу вийым пыштыше Валентина Гиздельханова.

Ушештарена, тиде «Муроҥгыр» муро пайремна вес ийын тыгак шыжа тылзыште эртышаш.

Автор: Валентина Гиздельханова.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.