Поэт Семён Николаевын шочмыжлан 80 ий теммылан пӧлеклалтше вашлиймаш

2016 ий 17 сентябрьыште Марий Эл Республикысе писатель ушем Марий Элын калык поэтше Семён Васильевич Николаевын шочмыжлан 80 ий теммылан пӧлеклалтше вашлиймашым эртарен колтыш.

Семён Николаевым ме тале марий поэт, кусарыше семын палена. Тудо марий йылмым йӧраташ моло-влакым эреак кумылаҥден шогышо айдеме лийын, йылмым пойдараш манын шонен, у мут ыштымаште шуко тыршен, шуэнрак кучылтмо мут-влакымат мондыман огыл манын ойлен.
«Семён Николаев самырык-влак дене пашам ыштыме секцийлам вуйлатен, нуным возаш таратен шоген», - поэт Анатолий Тимиркаев шке саламлымашыжым ойлымо годым палемдыш.

Чынжымак, Семён Николаевын творчествыжым пагалыше-влак поэтым порын шарнен илат, тудым Валентин Колумб дене ик радамыш шындат. «Таче кечынат тудын чон гыч лекше поэзийже дене мемнам куандара», - ешарыш поэт Геннадий Сабанцев-Ояр.

Семен Николаевын ятыр почеламутшо мурыш савырненыт «Ленин мемнан ачана», «Поро кас»…

Вашлиймашын кокымшо ужашыже у книга-влак дене палдарымаш семын эртыш. Марий Элысе писатель ушемым вуйлатыше Светлана Архипова автор-влак да нунын книгашт дене лиш ыштыш: Елена Юнусова «Копшаҥге сар» йоча-влаклан возымо йомак, Геннадий Гордеев «Ял ӱмбалне мужыр йӱксо», Зинаида Ермакова «Тек куржыт ийла» почеламут сборник, Я. Егоров-Энсул «Кочамын пӧлекше» чиялташ йӧрале (раскраска) сынан почеламут книга, Вячеслав Абукаев «Нигӧмат ом титакле» книга. Да поснак каласен кодыман, самырык автор-влакын пашаштым чумырен лукмо «Эрвий» альманах тӱням ужын. Тиде книга нӧргӧ тукымлан моткоч пеҥгыде шӱкалтыш да ӱшан.

Тыге, ӱшанен кодына, умбакыжат марий литератур вияҥ толеш, а самырыктукымын возаш кумылышт вияҥшеш. Возымо перашт пӱсӧ лийже.

Автор: Алина Макарова.
Хэштег: #мариарслан #поэт #культура #МарийЭл