Олык Ипайын шочмо кундемышкыже велокуржталмаш

2016 ий сорла тылзын 19 кечынже Морко кундемыште район кӱкшытан кугу семинар эртыш. Ты семинар марий калыкын ик эн йӧратыме поэтше Олык Ипайын 105 ияш лӱмгечыжлан пӧлеклалте. Садланак тудын темыжат поэтын серыме почеламут корнылаж дене йоҥгалте: «Куэрла кайык деч мый тунемым муро семым шӱм-кылыш погаш...»

«Морко мланде» газет редакцийын тӱҥ редакторжо Анатолий Титов, М.Янтемир лӱмеш районысо тоштер пашаеҥ В.Л. Павлова, туныктымо пӧлкан тӱҥ методистше С.Л. Александрова, районысо марий йылме да литератур, ИКН предметлам туныктышо-влак, уста спортсменке Г.В. Кузьмина да Морко 1-ше школын чолга тунемшыже Марина Сергеева Олык Ипайын шочмо вер-шӧрышкыжо унала коштын тольыч.

Кумужъял школым вуйлатыше В.А. Оразаевын икоян туныктышо коллекливше, Осипсола клуб пелен улшо В.А. Дмитриевын вуйлатыме «Весела кумыл» мурышо да куштышо уста ансамбльже, Тойметсола ялын поро калыкше уна-влакым шокшын вашлийыч. Шале ял шотан илем вуйлатыше С.Л. Николаев шке поро шомакшым каласыш.

Семинарын кажне участникшылан велосипед дене Морко посёлко гыч Олык Ипайын шочмо Тойметсола ялышкыже шумеш кудалаш кугу куан лие. Кумдан палыме поэтын талант шӱлышым погымо, шуаралтын кушмо вер-шӧрла дене эртыме пайдале экскурсий мондаш лийдыме кышам кодыш. Кумыжъер, Чоҥга курык да Токмырзан корем - чылажат Олык Ипайым шуарен да поэзий кумылым шӱм-чонышкыжо шыҥдарен.

А тачысе кечылан Олык Ипайын сурт олмыштыжо мотор оралте тӱзлана, кудыштыжо поэтын тукымжо М.И. Петрова шке ешыже дене ила. Пӧрт ончылно поэтлан чапкӱ волгалтын шога.

Тораштак огыл Ипайын шке кид дене шынден кодымо кок топольжо да ладыра куэже верысе калыкын чонжым тарвата.

Ипатий Степановичын кугезе уныкажат йӧратыме кочажын сылнымут аршашыжым йоҥгалтарен пуыш.

Кумужъял школат ты поэтын лӱмжым нумалеш, а школысо тоштер Ипатий Степанович Степановын пӱтынь илыш корныжым раш почын пуа.

Иктешлен каласаш гын, Олык Ипайын 105 ияш лӱмгечыже вашеш эртаралтше велокуржталмаш кажне участникын чоныштыжо сай кышам кодыш.

Автор: Елена Григорьева.
Хэштег: #мариарслан #мари #МарийЭл #марикалык