Пошкырт кундем Шопкер ялыш Марий самырыктукым слётын еҥже уна лийын

2016 ий сорла тылзын 24-ше кечынже Пошкырт кундем Караидель район Шопкер ялыште сылне марий концерт лие.

Такшым концерт-влак ялыштына лиеденак шогат. Тау артист-влаклан, мемнам огыт мондо, молан манаш гын, районыштына марий ял пеш шагал, а иленаже, корным шотыш налаш гын, «эн лишылак» огыл.

Туге шуко куштышо да мурышо коллектив-влак Мишкан район гычат, Марий Эл Республике гычат толын шогат. Теве кодшо гана Ардаш ялын «Акарт» фольклор коллектившым онченна гын, кызыт мемнам Марий Эл Республике гыч артист-влак куандарышт. Куандаренытак! Да калык шкат тиде концертым пеш вучен. А вет южо гана огытат погыно клубышкыжо. Тиде кастене изи гына ялна тичмаш зал дене мурызо-влакым куанен вашлие. Вет нуно палат: концертым Евгений Дербенёв кондыштара гын, товатат весела лиеш. Ты ганат тыгак лие.

Кӱтӱат толын, ушкалымат лӱштымӧ… Сар тӱсан изи автобус, концерт тӱҥалшаш нерген сигналже ден шитжтарен, урем дене вашкыде кӱзыш. А икмыняр жап гыч клубыш калык погынаш тӱҥале, да сцене гыч сылне марий муро-влак йоҥгалтыч. Весела да дискотекылан келшен толшо муро-влакым Алина Макарова йоҥгалтарыш. Каласен кодаш кӱлеш, Алина – Россий кӱкшытан VIII марий самырыктукым слётын участникше. Ме тудым сай мурызо да уста вӱдышӧ семын гына огыл, тыгак пеш весела, тыматле койыш-шоктышан йолташ семынат палена.

Калыкыште кумдан палыме муро-влакым Елена Желонкина яндар йӱкшӧ дене йонгалтарыш. А Миша Веселов музиканже дене (гармоньым мемнан дене тыге маныт) лач кызытсе илышлан келшен толшо муро-влакым шупшыльо. Товатат, тиде муро-влак деч вара йӱшат йӱмыжым чарна, пашамат йолагайже ышташ тӱҥалеш…

Прогамме пеш сае да оригинальный ыле: мыскара мурат, йӧратымаш нергенат, илыш нергенат муро-влак, калык муро-влакат тиде кастене йоҥгалтыч. Мутым Шопкер ял калык лӱм дене ойлем манам гын, нунат тореш огыт лий, шонем. Уэшын тиде коллективымак ме вес ий, вес кеҥежым уло кумылын вучаш тӱҥалына.