Мер Каҥаш вуйвер Марий самырыктукым слётын пашажым кÿкшын аклен

2016 ий 25 августышто Марий Мер Каҥаш вуйвер погынымаш эртыш.

MerKanash25.08.16_mari-arslan.ru_.jpg

Эн ончычак Мер Каҥаш вуйверын да вуйвер исполкомын еҥже-влак шукерте огыл, 7-11 августышто эртыше Россий кÿкшытан VIII марий самырыктукым слёт нерген ойлышт. Ты шотышто Слётын ик организаторжо Эльвира Куклина каласкалыш.

Икымше йодышым каҥашымашке моло-влакат уло кумылын ушнышт да Слётын пашажым кÿкшын аклышт. Теве Оршанке районышто тоштер комлексым вуйлатыше Анатолий Муравьёвын мутшо почеш, Марий самырыктукым слёт районым, школым тарвата, ялысе калыкын чонышкыжо тулым пышта, пашам ышташ кумылаҥда.

Тыгодым Слётым эртарыме кечым шукемдаш темлышт. А Килемар район марий ÿдыр-рвезе-влакым вашлияш ямдылалтеш. Тыге IX Марий самырыктукым слётым Арда селаште эртараш темлат.

Вес йодыш шушаш шинчымаш кече дене кылдалте. Мер активист-влак 1 сентябрьыште, могай школыш миен, йоча ден тунемше-влакым саламлат – тиде радамым палемдышт. Тыгак Марий Эл Республикым вуйлатыше Леониид Маркеловын «Об утверждении Положения об использовании государственных языков Республики Марий Эл и иных языков при организации и проведении культурно-массовых мероприятий в Республике Марий Эл» Указшым (89-ше №, 2016 ий 19 апрель) шотыш налын, школлаште Шинчымаш кече дене кылдалтше тÿшка пайремым марий йылме дене эртараш кÿлмö нерген иктешлышт. Тидым школлаште ойлыман да кузе шуктымыштым шекланен шогыман. Палемдыман, Мариий Эл вуйлатышын Пунчалжым шукташ манын, республикысе туныктыш да шанче министерстве приказымат ыштен.

Тидын нерген ойлымо годым Калыкле президент школ-интернатым вуйлатыше Лидия Иксанова ты тунемме верыште Шинчымаш кечым олыкмарла да курыкмарла вÿдаш кутырен келшыме нерген ойлыш.

1 сентябрьыште Марий калык конгрессын еҥже Виктор Наумов «Ямде лий» газет да «Ончыко» журнал редакций дене пырля У Торъял районысо школлашке лектеш. Тудо икмыняр школыштто нине газет ден журналлан подпискым ышташ полшаш сöрыш.

Вуйвер погынымаште Мер Каҥашын кумшо кварталысе паша радамжым ончен лектыч. Сентябрьыште вуйвер погынымаш Курыкмарий районышто лиеш.

Автор: Эльвира Куклина.
Хэштег: #мариарслан #марислет #viiimarislet #мари #самырыктукым #марикалык