Сылнымут: «Куанышым, куэм ӧндал…»

«Куанышым, куэм ӧндал…» Тыге лӱмден «Кум томан ойпого» книгажын икымше томжым Марий Элыштат, Россий кумдыкыштат кумдан палыме поэтесса Зоя Дудина. Книга шукерте огыл авторын лӱмгечыж вашеш лектын. Марий Элысе тӱвыра, печать да калык-влакын пашашт шотышто министерствын «Массовый информаций да книга лукмо пашам 2009-2013 ийлаште вияҥден колтымо» целевой программыж почеш савыкталтын.

«Куанышым, куэм ӧндал…» книгашке поэзийым чумырымо. Почеламут-влак шочмо мланде, калык, тудын поян историйже, йӱлаже нерген каласкалат. Ава ден икшыве кокласе кыл, йӧратымаш нергенат автор кумдан да келгын шонкала. Пӱртӱс дене иктеш улмо шижмашыже Зоя Дудинан серымыжым моло поэт деч ойыртемалтшым ышта. Тыге возымо икымше том тӱҥалтыште.

А тӱрыс кум томыш З.Дудина тымарте возымо почеламут ден очеркше-влакым чумырен, пошкудо да родо-тукым калык-влакын сылнымутыштым марлаҥден, мыланна лудаш ямдыла.

Поэтын тылеч ончыч лекше книгаже-влак: «Мый шкежат суксо омыл» (1998), «Колыштса шӱшпык чон шортмым» (2000), «Эрелан йӧратыме тат» (2004), «Ойырымо ойпого» (2006), «Шеремет, Шернурет» (2010), «Муралте, авай, марий мурым» (2011). Зоя Дудинан почеламутшо-влакым тӱрлӧ йылмыш кусарыме. Тыгак тудо «Муралте, авай, марий мурым» (2011) книгам савыктен. Тушко поэтын возымо шепкамурыжо-влак пуреныт. «Нылле ик порылыкым налын… - Сорок и одна доброта» (2008) книгашке палыме еҥ-влакын шулдыран ойыштым чумырен.
Тыгак почеламутшо тӱрлӧ книгаште, "Ончыко", "Кече" журналлаште печатлалтыныт, ятыржым рушлат, финн-угор да моло йылмышкат кусарыме.
Зоя Дудинан икымше мочеламутшо "Ямде лий" газетыште 1976 ийыште лектын. Тудлан усталык корнышко ошкылым ышташ туныктышыжо З.В.Ермакова полшен.
Илен-толын, тудо шочмо вер-шӧржылан, калыклан чон гыч ташлыше шуко почеламутым пӧлеклен.Тӱҥалтыш творчество корныжо шӱлык да чон коржмо, но тыгодымак илышым нимучашдымын йӧратыме кумыл дене кылдалтын гын, пытартыш сборникше-влак марий фольклор, тӱҥ шотышто чимарий кумалмаш деке мелын савырненыт.

PS: Зоя Дудина. Кум томан ойпого. Икымше том: Куанышым, куэм ӧндал... – Йошкар-Ола: «Марий Эл» газета» ООО, 2012. – 464 с.