Мари-Суксу ялыште келшымаш пайрем

Татарстан кундем Актаныш районысо Йӱштӧ Памаш ялыште илыше марий калык татар пошкудо дене ожнысек келшен ила. Пырля пашам ыштат, пайремым эртарат, мӱндыр уна-влакымат порын вашлийыт.

2016 ий сӱрем тылзын 13-15 кечылаштыже Актаныш районышто «Ак калфак» Тӱнямбалсе татар ӱдырамаш-влакын мер организацийышт гыч делегат-влак уна лийыныт. Нуно Татарстан кундемыш пурышо 32 районла гыч, Российын 22 регионжо гыч, Таджикистан, Австралий, Беларусь, Польша, Казахстан, Туркменистан, Финляндий гыч толыныт. Чылаже 150 еҥ, 5 тӱшкалан шелалтын, яллашке лектыныт. Мӱндыр уна-влакым вашлияш мыланнат пиал шыргыжалын.

Эн ончыч ял покшелне йогышо яндар вӱдан Йӱштӧ памаш уна-влакым шкеж деке ӱжын. Делегаций татар калык коклаште шке йылмыжым, тӱвыражым арален кодышо марий ялын историйже дене палыме лийын. Тамле вӱдшым подылаш тыланыше еҥ памашлан теҥге оксам – пӧлекым пыштен. Туштак шолын шинчыше самовар гыч шокшо чайым темлыме, пагалыме уна-влаклан пӧлекым кучыктымо.

Тыгак марий калыкын сийжылан поян ӱстел-влак уна-влакым школ уремыште шке йырышт чумыреныт.

А школ кудывечыште пайремым Ирина Миникаева вуйлатыме «Ший памаш» калык ансамбль сӧрастарен. Марий муро да куштымаш кумылым нӧлтеныт.

Вучен налме уна-влакым ужаташ жап шуын. Корно пошкудо Татар Суксу ялышке шуйнен.

Тиде вашлиймаш татар ден марий калык кокласе кылым эше пеÿгыдемден. Тÿшкаште – вий.

Автор: Галиева Ирина Александровна, Актаныш район, Мари-Суксу ял.
Фото Елена Ирдуганован.

• Афиша
• Тӱвыра увер
• Новости культуры

• Тӱрлӧ кундем гыч увер