«Саскавий» марий ÿдырамаш ушем «Марий солык» конкурсым эртара

Вход на сайт

logotip_saskavij_0.jpg2016 ий 25 июньышто (Пеледыш пайрем годым) Йошкар-Олаште «Саскавий» марий ўдырамаш ушем «Марий солык» конкурсым эртара.

Акрет годсек кажне марий ешыште солык кеч-могай пайремым эртарымаште, кеч-могай йÿлам шуктымаште ик эн тÿҥ верым налеш. Эрдене эр кынелын, чурийым яндар вÿд дене шÿалтен, ару солык дене ÿшытылын коштат; киндым коҥга гыч кÿэшт луктыт - ош солыкеш вÿдылыт; сÿаным але кугу унам капка ончыко налаш лектыт - кинде теркем солыкеш вераҥдат; сÿан калыкым куштыктышо гармончо ден тÿмырчыланат солыкым пуат; марлан мийыше ÿдыр кумалтышлан солыкым опта; салтакыш кайыше рвезылан солыкым кылдат… Тиде радамым эше ятыр шуяш лиеш.

Коча-кованан шондыкышто аралалтше солык – марий еш але посна еҥ нерген каласкалыше шергакан поянлык. Тидым шотыш налын, «Саскавий» марий ÿдырамаш ушем «Марий солык» конкурсым увертара.

«Марий солык» конкурсыш ушнышо-влаклан йодмаш:
- Могай-гынат йÿлам шуктымаште кучылтмо ик солык нерген каласкалаш.
- Тиде солык кован шондыкшо гыч лукмо але тачысе саманлан келыштарен тÿрлымö лийын кертеш.
- Солык дене кылдалтше йÿлам модын ончыкташ лиеш.
- Муро дене каласкалаш лиеш.
- Солыкын могай йÿлам шуктымыжым почеламут полшымо дене умылтараш лиеш.
- Солыкысо тÿрын молан келыштаралтмыжым, шÿртым молан тыгай тўсаным кучылтмым умылтарыман.
- Презентаций 5-7 минут деч утла шуйнышаш огыл.
- Йодмашым 20 июнь марте тыгай адрес дене колтыман:
424000, Республика Марий Эл,
г. Йошкар-Ола, ул. Первомайская, 109.

Але mari-centr@mail.ru электрон почтыш. Телефон/факс (836)2 45-88-51.

Конкурс 25 июньышто паркысе Кеҥежымсе эстрадыште 15 шагатлан тÿҥалеш.

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.