Алевтина Баязитован у книгажын презентаций

2016 ий май кыдалнырак Пошкырт кундем Калтаса районышто илыше поэтессе Алевтина Баязитован «Олмапу пеледме годым» кумшо книгажын презентаций эртыш.

Вашлиймаш годым поэтессын почеламутшылан возымо ятыр муро йоҥгыш. Мурым шкежат Алевтина Баязитова, Лилия Матвеева ден Виктор Ванюшкин, Кристина Русиева, Оксана Миннебаева мурышт.

Пайрем касым Башкортостан Республик тӱвыран сулло пашаеҥже Римма Исламгалиева, РБ Келшымаш пӧртын Марий историй-культур рӱдерым вуйлатыше Алексей Ибулаев (Васли Ольош), «Ший оҥгыр» калык вокал ансамбль (вуйлатыше Валентина Гиздельханова) сӧрастарыш. «Эрвий» калык ансамбль куштымаш-влакым пӧлеклыш. Васли Ольош шӱвыр дене шоктен куандарыш.

Амзибаш тӱвыра пӧрт пеленсе (вуйлатыше Андрей Петраев) художественный самодеятельность коллектив муро-влакым йоҥгалтарыш. Амзибаш школын тунемшыже-влак Алевтина Баязитован почеламутшо-влакым лудыч. Ангелина Исинбаева шке почеламутшо дене палдарыш. Каласыман, школышто шочмо йылмым тунемыт, поэзий деке шӱмаҥдат.

Ялшотан илемым вуйлатыше Геннадий Шуматов Алевтиналан пӧлекым кучыктыш.

У книга лекме дене Марий Эл тӱвыран сулло пашаеҥже Влад Николаев, Марий Элын сулло артисткыже Эльвира Попова, Марий Эл писатель ушемым вуйлатыше Светлана Архипова саламлышт. Калтаса район «Эрвел марий» марий калыкле-тӱвыра автономийым вуйлатыше Инна Тимиряева, «Калтасинская заря» газет редактор Виталий Акиев пӧлекым ыштышт.

Алевтина палыме композитор-влак Сергей Маков, Юрий Евдокимов-Тойварс (Марий Эл), Валерий Садретдинов, Андрей Иликбаев (Пошкырт) дене пеҥгыде кылым куча. Поэтессын почеламутшо-влак шочмо мландым, калыкым йӧратымаш нерген ойлат. Умбакыжат, Алевтина, усталык пашада вияҥ шогыжо!