Студент-влак «iВолга–2016» молодёжь форумлан ямдылалтыт

Уремыште май, а Марий кугыжаныш университетысе студент-влак кеҥеж тургымлан ямдылалтыт. Сессий деч вара нуно тӱрлӧ кӱкшытан молодёжный форумлаште вийыштым тергаш тӱҥалыт.

Ӱмаште студент-влакын 7 проектышт грант дене палемдалтын. Тений, утларак сай лектышыш шуаш манын, эше ий тӱҥалтыштак Проектирований школым почмо. Тудым йот йылме-влак факультетын студентше Константин Арон вуйлата, шкеже кодшо кеҥежым 700 тӱжем теҥгеаш 3 грантым сеҥен налын. Проектирований школыш 80 студент ушнен. Тушто проектлан темым ойыраш полшат, кузе возаш да аралаш туныктат.

Кызыт МарГУ-со студент-влак «iВолга–2016» регион-влак кокласе молодёжный форумлан ямдылалтыт. Тудо 15 гыч 25 июнь марте Самара областьыште эрта, тушко пӱтынь Юл кундемысе федерал округ гыч вузлаште тунемше-влак погынат.

«iВолга» форумышто 9 смене пашаш ышташ тӱҥалеш.

Мемнан студент-влак 4 тылзе жапыште проектым ямлылыме пашам шуктеныт: вӱдышӧ эксперт-влак мастар-класс ден тренинглам, консультаций ден мозговой штурмлам эртареныт.

Лектышыштат куандарыше: форумын официальный сайтыштыже МарГУ деч чыла направлений дене 75 проектым регистрироватлыме. «Инноваций да технический творчестве» направлений дене – 7, «Спортивный молодёжь – таза наций» – 12, «Тый – предприниматель» – 14, «Медиаволна» – 10, «Политике» – 4 проект да молат.

20 май деч вара региональный экспертный комиссий «iВолга–2016» форумышто участвоватлаш эн сай проект-влакым ойырен налеш. Ӱшанен кодына, МарГУ-со студент-влакын ятыр проектышт нунын радамыш логалеш.

PS: «iВолга–2016» регион-влак кокласе молодёжный форумыш «Самырык этножурналист школ» проектын еҥже-влакат каяш ямдылалтыт. Нунат шке проектыштым аралаш тӱҥалыт.

Автор: Леонид Гимаев.

• У ТУКЫМ
• НОВОЕ ПОКОЛЕНИЕ