«Мый марла ойлем» акций Йошкар-Олаште эртыш

Вход на сайт

2016 ий 26 апрельыште Йошкар-Олаште игече пеш мотор шогыш. Ояр канде кава гыч кече шыратен ончыш, мыйымат шыматыш, а леве мардеж ораде йочала шижтарен модо, ӱпым товатыш...

Тиде кечын мый Изи Какшан сер воктеке каяш лийым. Иктаж 100-200 метр Йошкар-Оласе Кремль марте кодмеке, пылышемлан марий сем шоктыш. Лишкырак мийымеке, чонемлан келшыше муро-влакым кольым. Да, вет ондаксе марий парк верыште «Мый марла ойлем» акций эрта!

Тышке чылажге 150 утла еҥ погыныш. Тӱрлӧ ийготан: тӱҥалтыш классыш коштшо йоча, студент, мужаран ӱдыр-рвезе, самырык ача-ава, илалшырак-влакат.

Чумыргышо-влакым кум тӱҥ герой (Ӧ, Ӱ, Ҥ буква-влак) куандарышт. Нине буква-влак марий йылмым чоҥаш полшат. Нуным чыла йылмыштак от вашлий. Тыгай ойыртемалтше тамга-шамычын рольыштым Марий тӱвыра рӱдерын пашаеҥже-влак модыч. Лач тиде рӱдер Республикысе тӱвыра, печать да калык-влакын пашашт шотышто министрестве полшымо дене акцийым эртарышт.

Йылме дене кылдалтше мероприятий пайрем гаяк лие. Тыште марий тывырдыкым куштышт, самырык ӱдыр-влак тӱрлӧ мурым шергалтарышт, сылне почеламутым йоҥалтарышт, «Мундыра» модыш дене модыч.

Акцийыш марий дене пырля тӱрлӧ калык ушнышт: «Зардон» одо ансамбльын самырык куштышыжо-влак, «Бердәмлек» татар самырыктукым ушемын еҥже-влак, чуваш ӱдыр-влак. Руш-влакат шукын ыльыч. Марий йылмым тунемаш шонышо-влаклан «Мый марла ойлем» буклет-шамычым да тыгаяк лӱман оҥыш пижыкташ значок-влакым пуэдышт.

Кремль кӧргыштӧ шукынжо марла кутырышт. Пайремыш толшо марий-влак Кремль капкам лекмекат, тыгак мала кутыраш тӱҥалыт манын ӱшанен кодам.

А пайрем веселан эртыш. Акций умбакыже шуйна. Тылзе жапыште кевытлаште, школлаште да моло вереат «Тыште марла мутланаш лиеш» наклейке-влакым пуэдаш тӱҥалыт.

Автор: Светлана Ёлкина.
Фото Вероника Мустаеван.

26 апрель - Марий талешке кече. Лудаш>>>
Марий талешке кече дене! Шарне тыят тукыметым!!!

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.