«Усталык» творческий лабораторий

2016 ий вӱдшор тылзын 20 кечынже Республикысе марий тӱвыра рӱдер, Композитор да Писатель ушем-влак «Усталык» творческий лабораторийым эртарышт. Тышке самырык мурызо, композитор, мутым возышо-влак чумыргышт.

Программе почеш кум секций пашам ыштыш: композитор мастарлык, мутым возымо практикум да вокал технике. Мурым возышо-влак дене Марий Элысе композитор ушемым вуйлатыше Валерий Кульшетов вашлие.

Валерий Дмитриевич семым возымо шотышто шуко ой-каҥашым пуыш. Таче чылт марий сем чӱчкыдын вашлиялтеш мо? Але семым «шолыштына»? Икгай мурат ятыр шарлен. Нине да моло йодышланат вашмутым кычальыч.

Кокымшо секцийыште Светлана Яндукова дене пырля вокал технике нерген ойлышт. Тудо мурымо годым шӱлышым чын налаш, йӱкым чын лукташ туныктыш.

А кумшо секцийыш Альбертина Иванова самырык возгалыше-влакым чумырыш. Почеламутым чын возымаш, мурылан могай почеламут утларак келша да тачысе илышыште могай мут семлан возеш – чыла тидын нерген палыме поэтессе дене кутырымо.

Вара йыргешке ӱстелыш погынымо. Ты мутланымашке марий эстрадын ончыклыкшо верч тургыжланыше-влак ушнышт: Эльвира Попова, Александр Речкин, Роза Искакова, Лидия Иксанова, Вера Гордеева, Александр Мамаев да молат.

Мутланыме годым тыгай иктешлымашке шуыч: марий мурын ачажат-аважат уке, семжат да мутшат лушкыдемын, шуко мурызын йӱкшӧ чын шындалтын огыл. Тыге мурым калык ончыко лукмо деч ончыч палыше да опытан еҥ-влаклан тергаш пуыман. Кч-могай мурат посна комиссий гоч эртышаш манын пунчальыч.

Автор: Алина Макарова.
Фото Христина Александрован.