Студент-влак дене «Таза капыште - таза чон» вашлиймаш эртыш

Шымше вӱдшор тӱнямбал тазалык кечылан шотлалтеш. Тиде кечылан пӧлеклалтше «Таза капыште - таза чон» пайдале да кӱлешан вашлиймашым 2016 ий 6 вӱдшорышто Марий кугыжаныш университетын 4-ше №-ан тӱшкагудыштыжо «Саскавий» марий ӱдырамаш ушем эртарыш.

Ӱдыр-рвезе-влак деке «Саскавий» ӱдырамаш ушемым вуйлатыше Людмила Кошкина, ты ушемын еҥже-влак Маргарита Тойшева, Зинаида Александрова, Эльвира Куклина миеныт ыле. Тыгак гинеколог Надежда Смирновам ӱжыныт.

Надежда Николаевна самырык-влаклан шуко пайдале ой-каҥашым пуыш, вет илен-толын нунат ава лийшаш улыт. Ончыкылык нерген кызытак шоныман, садлан эмлызе вучыдымо мӱшкыраҥмаш деч кузе аралалтме да, ава лияш шонен пыштымек, мом ышташ кӱлмӧ нерген каласкалыш. Педиатр Маргарита Тойшеват икмыняр йодышым рашемден кодыш.

Тыгай вашлиймаш-влакым чÿчкыдынрак эртараш кутырен келшышт. Иктешлыме годым, тунемше-влак вес гана кӱчым ыштыше мастар, врач-нарколог да моло специалист денат йыргешке ӱстелым эртараш темлышт.

Автор: Вероника Мустаева.

• Союз женщин мари "Саскавий"
• "Саскавий" марий ӱдырамаш ушем