Марий тиште кече: Марла чын возен моштет?
Вход на сайт
2015 ий 9 декабрьыште Марий тиште кече вашеш Марий кугыжаныш университетысе Калык культур да тӱвыра кокласе кыл институтышто III "Марла чын возена" кумшо тÿшка диктантым 250 наре еҥ возеныт.
Марий йылме орфографий да пунктуаций дене шке шинчымашыштым тергаш шагал огыл погыненыт: школышто тунемше, туныктышо, воспитатель, кӱшыл да кыдалаш тунемме учрежденийла гыч студент, тӱвыра, шанче пашаеҥ-влак. Диктантым возаш Советский, Морко, Кужеҥер, Йошкар-Ола да турло моло вер-шӧр гычат уло кумылын толыныт. Тыгак верлаштат кумылан-шамыч шинчымашыштым тергеныт.
Куанен каласыме шуэш: шанче да тӱвыра пашаеҥ-влак веле огыл, икшыве-влакат, нунын туныктышышт марий йылмын кӱлешлыкшым шижыт, умылат, тудым тунемыт, аклат, пагалат, тудын дене кутырат. Мемнан шочмо марий йылмына ий гыч ийыш тӱзланаш тÿҥалеш манын, ӱшанен кодына.
Автор Христина Александрова, «Арслан» журналын корреспондентше.
- Эльвира Куклина
- ср, 12/09/2015 - 21:28
