«Марий Мурсем» студент фольклор ансамбль районлашке лектын коштеш

2015 ий 27 ноябрьыште Марий Элын Советский да У Торъял районлаштыже шке концерт программыжым «Марий Мурсем» студент фольклор ансамбль ончыктыш. Тиде коллектив Марий кугыжаныш университет пелен пашам ышта. Вуйлатыше – республикысе тÿвыран сулло пашаеҥже Родион Сергеевич Алексеев. Хореограф - Василий Евгеньевич Кириллов.

«Марий Мурсем» ансамбль 2002 ийыште Виталий Иванович Макаровын шонымашыж почеш шочын. Ончыч ныл ӱдыр гына лийын, а вара кажне ӱдыр партнёрым кычалаш тӱҥалын. Администраций костюм да семӱзгар-влак дене полшен. Тыге эркын-эркын кугу коллектив чумырген. Жап эртен, ансамбль Марий Элыште гына огыл, а тӱрлӧ регионыштат палыме лийын. Ынде тиде ансамбльлан 13 ий. Кызытсе жапыште тушко 30 утла самырыкъеҥ коштеш. Нуно Калыкле тӱвыра да тӱвыра кокласе коммуникаций институт, Физике-математике ден Йот йылме-влак факультетла гыч улыт. Мутат уке, кажныжат уло кумылын коштеш.

Тыге марий калыкын тӱрлӧ тӱшкажын куштымашыжым, мурыжым тунемыт. Тиде пеш сай.

«Марий Мурсем» эртыше кугарнян Советский районысо Ӱшнÿр кыдалаш школышто да У Торъял район клубышто мастарлыкшым ончыктыш. Концерт программыште муро да куштымаш деч посна, Арсий Волковын «Оръеҥ мелна» пьесыж гыч ужаш лие. Екатерина Гуленкова скрипке ден шке композицийжым шоктыш. Надежда Имаева да Анастасия Галиева палыме поэт-влакын почеламутшым лудыч. Полина Савельева Александр Мамаевын «Тиде илыш» у мурыжым йоҥгалтарыш.

«Концерт пеш сӧрал да оҥай номер-влаклан поян лие. Студент-влак куштен да мурен гына огыл, а актёр семынат модын моштышт. Мыланна моткоч келшыш! «Марий Мурсем» ансамбльлан чыла сайым тыланем, ончыкыжымат мемнам у номер-влак дене куандарен шогыжо», - сылне мут-влакым У Торъял район гыч Альбина Мамаева каласыш.

Автор: Анастасия Галиева, «Арслан» журналын журналистше.
Фото-влак Вера Рублёван.

• Сылнымут
• У ТУКЫМ
• НОВОЕ ПОКОЛЕНИЕ