Самырык этножурналист школ ÿжеш

Вход на сайт

Самырык годым чын илыш корным, ыштышаш пашам ойырен моштыман. Тыгодым эреак шуаралташ, уш-акылым пойдараш кӱлеш. Ик палыме еҥ палемден: илышыште эреак кӱлешан лийнет гын, шуко лудман да ушан еҥ-влак дене кылым кучыман, нунын дене чӱчкыдынрак мутланыман. Тиде шонымаш денак Марий кундемыште Самырык этножурналист школ шочын. Тудо ынде 2013 ий годсек «Арслан» этнокультур интернет-журнал пелен пашам ышта. Ик эн кугу йолташна – Марий кугыжаныш университет, тудын журналистике пöлкаже (кызыт виктыш).

DenMolodehsi1_Arslan.jpg

«Самырык этножурналист школ икмыняр йыжыҥым эртен, ятыр семинар, лабораторий лийын, вес кундемышкат – тӱрлö молодёжь мероприятийыш – лектын коштмо, республикыштат шкем ончыктена. Южышт шинчымашым налын, мемнан деч ойырленыт, но журналистике дене кылдалтше пашамак шуктат. Таче Школышто тӱрлö тунемме вер гыч 20 ӱдыр-рвезе улыт. Ме кажне изарнян вашлийына. Тыгак оҥай еҥ-влак дене палыме лийына, шуаралтына. Тиде тунемме ийыште практике пашалан, интернет-журналистикылан кугу тӱткышым ойыраш шонен пыштыме», - каласкала проектым вуйлатыше Эльвира Куклина.

Кызыт ме тыланда, лудшо таҥ-влак, Самырык этножурналист школын икмыняр еҥже дене палдарена да нунын мутнам вашталтена. Кузе тышке логалыныт? Келша мо нунылан тиде проект?

AlevtinaBokova.JPGАлевтина Бокова, МарГУ, журналистике пöлка:
- Самырык этножурналист школыш Марий кугыжаныш университетын журналистике пöлкаштыже тунеммылан кöра логалынам. Журналистике пöлка пелен эн ончыч «ОбъективТВ» группо шочо, вара Эльвира Викторовна толмо дене «МариОбъективым» ыштышна. Тунамак Самырык этножурналист школ нерген пален нальым. Тыште чылажат оҥай. Мастар-класс, тренинг, лекций-влак эртат. Шуко палыме еҥ дене вашлийына. Тыге у кыл-влак шочыт. Ятыр мероприятийыште лиедена. Чыла тиде шуаралташ, ӱшанле йолташ-влакым муаш полша. Теве тений кеҥежым Школлан кöрак Курыкмарий районышто «КРАВЕЦ», Ростов-на-Донушто студент форумлаште лийым. Толза мемнан деке, Самырык этножурналист школышто уш-акылым пойдараш, у деч уым пален налаш йöн шуко.

Maksim Algajkin.jpgМаксим Алгайкин, Оршанке педколледж:
- Самырык этножурналист школыш Эльвира Викторовна дене палыме лиймеке логальым. Эн ончычак практике пашалан кугу тӱткышым ойырена – тиде моткоч сай. Эше тӱрлö кундемыш лектын кошташ, оҥай мероприятийыште лияш йöн лектеш. Теве кеҥеж пагытым налаш – кушко гына ышна мий! Мыланем Владимир ола ушеш кодо. «Территория смыслов на Клязьме» форумышто лийме. Кок ий почела Марий самырыктукымын слётыштыже участвоватленам. Туштат мемнан Самырык этножурналист школна посна пашам ыштен. Слёт годымак «Самырык этножурналист» регион-влак кокласе мер ушнымашым ыштыме. Мый тудым вуйлатем. Ынде Оршанге колледж пелен «Самырык этножурналист школ» кружокым почаш шонена.

XristinaIvanova.jpgХристина Иванова, МарГУ, Калыкле тÿвыра да тÿвыра кокласе коммуникаций институт:
- Самырык этножурналист школ нерген мыланем йолашем-влак увертареныт. Тыште мыланем келша. Марий Элын чолга еҥже-влак дене эреак вашлийына – тиде моткоч сай. Кеҥежым Российысе VII марий самырыктукым слётышто, «Самырык этножурналист» лужаште лийым. Слётышто самырыктукымлан шкем шуараш полшышо оҥай программе темлалтын: могай лийшаш ончылъеҥ, койыш-шоктышым кузе шкалан шуараш, тыгодымак ӱдыр-рвезе-влак лужаште пашам ышташ, кеч-могай сомылым радамлын чоҥаш, жапым чын кучылташ тунемыныт. Тиде слётышто мый шуко у йолташым муынам. Тыгак «Арслан» журнал дене кылым кучем. Тиде икымше марий этнокультур интернет-журнал. Тыште чыла уверымат эн ончыч пален налаш лиеш! Тудо марий калыкын илышыж нерген каласкала, марий тӱвырам да йӱлам почын пуа. Ме, самырык этножурналист школын тунемшыже-влак вуйлатыше Эльвира Викторовна дене пырля тӱрлö уверым, статьям тышке луктын шогена. Лудса www.mari-arslan.ru интернет-журналым, марий калык! А самырык йолташем-влак, тендам Школышкына ушнаш ӱжам. Ме ик эн чолга марий самырырыктукым еш улына, да пырля эшеат у кӱкшытыш шуына.

VeronikaMustaeva.jpgВероника Мустаева, МарГУ, Калыкле тÿвыра да тÿвыра кокласе коммуникаций институт:
- Этножурналист школлан кöра шуко вере лияш логалеш. Теве Самара кундемыште «iВолга» форумышто, Москошко Калык-влак кокласе кыл нерген каласкалыше журналистике гильдийын конференцийышкыже миен коштынам, Россий кӱкшытыштö тыршыше палыме журналист-влак дене вашлийынам. Тиде Школ илышыште вожылдымо лияш, шкем еҥ коклаште кучен мошташ туныкта.

NikaCozonova.jpgНика Созонова, Йошкар-Оласе торгово-технологический колледж:
- Интернетыште Школ нерген уверым ужынам, кутырен келшымеке, пырляшке ушненам. Тиде проектлан кöра пытартыш пел ий жапыште чолгарак лияш тунемынам, вет калык ончыкат лектын выступатлаш тыршена. Теве икымше гана «Самырык этножурналист» акцийым эртарен колтышна. Йошкар-Ола уремыш лектын, фотографийым ыштышна, конкурс-влакым эртарышна, выставкыште участвоватлышна. Тыгодым мый почеламутым лудым. Тиддеч вара Республикысе молодёжь форум годым выступатлышна. Чылажат моткоч сай, кушкаш полша.

CvetaElkina.jpgСвета Ёлкина, МарГУ, журналистике пöлка:
- Самырык этножурналист школыш эше икымше курсыштак логалынам. Лач тунамак универсетыштыште кечыше увертарымаш шинчалан пернен: 2013 ий 2 декабрьыште Самырык этножурналист школ почылтеш. «Миен толаш оҥай ыле», - шке семынем шоналтенам. Вара вес кечынже «Журналист» клубын погынымаштыже Эльвира Викторовна дене вашлиймаш лийын. Тунамак тиде пайдале мероприятий дене каласкалышт. «Миемак!» - шкаланем иктешлымашым ыштенам. Этножурналист школын занятийже-влак университетыштак эртышт. Шуко тунемше дене мый ончычак палыме лийынам, а южыштым икымше гана ужынам. Чылашт денат келшен шинчынам, кызытат вашла кылым кучена. Тунемме программе, мыйын шотышто, кажныжлан пайдале да оҥай лийын. Кызытат тиде школыш кошташ келша.

AnnaBasiljeva.jpgАнна Васильева, МарГУ, Калыкле тÿвыра да тÿвыра кокласе коммуникаций институт:
- 2015 ий февральыште Интернетыште увертарымашым ужынам. Мыят тышке ушнышым да мотокч куаненам. Тиде школ чыла шотыштат пайдале: тӱрлö сынан тунеммаш, оҥай деч оҥай еҥ дене вашлиймаш, вес кундемлаш лектын коштмаш. Мый шкеже «iВолга» форумым шарналтем. Эше проект-влакым возаш тунамына. Тыгай школ илышыште кӱлеш.

NastjaGalieva+.jpgАнастасия Галиева МарГУ, Калыкле тÿвыра да тÿвыра кокласе коммуникаций институт:
Школышто 2014 ий годсек улам. Тудын пашаж дене Параньга район Олор ялыште VI Марий самырыктукым слёт годым палыме лийынам. Мыйын шонымаште, Самырык этножурналист школ талант-влакым почаш полша, шке виетлан ӱшаным пеҥгыдемда. Шочмо йылмына да руш йылме дене сылнын возаш тунемына. Тыгак тӱрлö презентацийым, проектым, буклетым, видео ден фотом ышташ тунемына. Кумылда лекте, тугеже вашкерак мемнан деке ушныза.

DinaKonovalova.jpgДина Коновалова, МарГУ, Калыкле тÿвыра да тÿвыра кокласе коммуникаций институт:
Самырык этножурналист школ нерген мый ондакак колынам ыле, но тушко кошташ логалын огыл. А нылымше курсышто тунеммем годым, практикым «Арслан» этнокультур интернет-журналыште эрташ кумылем лектын. Статья-влаклан материалым погымо годым, шуко мероприятийыш Самырык этножурналист школышто тунемше-влак дене пырля коштынам. Тыге мый тиде школышко ушненам. Практике эртымекат, кошташ тӱҥалынам. Тыште чыла денат оҥай. Эн тӱҥжö, журналист материал дене пашам ышташ, шке шонымашнам кагазыш возаш, калык дене мутланаш тунемына. Виян, весела улыда, возаш йöратеда да умбакыжат шке мастарлыкдам шуараш шонеда гын, Самырык этножурналист школ тендам уло кумылын вуча!

BalerijaBasiljeva_0.jpgЛера Васильева, МарГУ, журналистике пöлка:
Мый этножурналист школышто оператор сомылым шуктем, возашат йöратем. Тыште мыламат келша, чолга лияш туныктат.

Эре ончылно, кӱлешан лийнет – ушно Самырык этножурналист школыш. Чынжымак, пайдале школ. Эше ик гана ойлена: вашлиймаш-влак кажне изарнян эртат, тӱрлö вере лектын коштыт, тӱрлö еҥ дене вашлийыт. Йодыш уло гын, возо – mari-arslan@mail.ru. Тиде проект дене кылдалтше уверым www.mari-arslan.ru сайтыште муаш лиеш.

8h2tOtPz-R0.jpg

IMG_9586.JPG

DSC02458.JPG

Mari
АНО «ИНТЕЛЛЕКТУАЛ»
АНО «Культурно-информационный центр «ИНТЕЛЛЕКТУАЛ»
При использовании материалов сайта ссылка на «Этнокультурный интернет-журнал «Арслан» обязательна.
E-mail: mari-arslan@mail.ru. Тел. 8-917-703-66-24.